Жас инспекторлар жарысып жатыр
Өскеменде еліміздің өңірлік жеңімпаздары, сондай-ақ, Ресей мен Қырғызстан командаларының қатысуымен Ғазиз Байтасов атындағы жас инспекторлар қозғалысы республикалық слеті өтіп жатыр. Шығысқазақстандық мектеп оқушылары слетке қатысушыларды жылы қарсы алды. Жекпе-жек сарайында слеттің ашылуына жиналған мектеп оқушыларының назарына жол қозғалысы қағидаларын сақтау, балалардың жол-көлік жарақаттарының профилактикасы тақырыбында әсерлі қойылымдар және шоу көрсетілді. Мыңдаған балалардың алдында жас өнерпаздардың шығармашылық тобы өз өнерлерін көрсетті.
Атқарушы билік, білім беру және полиция органдарының бірлесіп ұйымдастырған салтанатты іс-шарасы әрбір жас слет қатысушысының және жас көрермендердің жүректерінде ұмытылмастай әсер қалдырды.
Осы слет Өскемен қаласының маңындағы сұлу табиғат аясында орналасқан «Дарын» өңірлік ғылыми-практикалық орталығында (бұрынғы «Матросов» балаларды-сауықтыру орталығы) өтуде. Слетқа қатысушы оқушылар сайысқа қатысумен шектелмей, демалуға және Шығыс Қазақстан табиғатының әдемілігін тамашалау мүмкіндігіне ие болды. Слетқа барлығы 18 команда – 180 оқушы қатысып, үздік жас инспекторлар «Жол жүрісі қағидасын білу», «Жас реттеуші», «Велосипедті мәнерлеп айдау», «Эрудиттер байқауы», «Жас санитарлар», «Велосипедті автоқалашықта айдау», «Үгіт бригадалар байқауы», «Саптық жарыс» байқауларында бақ сынауда.
Слетті өткізу бағдарламасы бойынша жарыстардан басқа, көптеген қызықты спорттық және мәдени іс-шаралар, байқаулар, саяхаттар, семинарлар және кездесулер өткізілді.
– Байқаулардың нәтижелері бойынша Қазақстанның 2017 жылғы ең мықты ЖИҚ командалары анықталады. Слетке ТМД елдерінің жасақтары қатысатындықтан, аталмыш шараның халықаралық маңызы бар. ЖИҚ слеттері мен байқаулары жас ұрпақтың мәдени деңгейіне жағымды әсер етеді, балалардың денсаулығы мен өмірін сақтауға ықпал етіп, жасөспірімдердің жол-көліктік жарақаттану оқиғаларының алдын алуға нақты ықпалын тигізеді, – дейді ІІМ әкімшілік полиция комитетінің ресми өкілі Ақтоқты Боранова.
ЖИҚ слетінің негізгі мақсаты – балаларды және жасөспірімдерді жол-көлік оқиғаларынан сақтандыру, жол қозғалысы заңына бағынуға тәрбиелеу, салауатты өмір салтын насихаттау, балалардың қатысуымен жол-көлік оқиғаларының санын төмендету, жол жүрісі қағидалары бойынша қатысушылардың білім сапасын көтеру бойынша жұмыстарды жандандыру. Жас инспекторлардың қозғалысы алғаш 1973 жылы өркендей бастады.
Ал 2001 жылы ІІМ жол полициясының комитеті бұл қозғалысты қайта жандандыру және Алматы қаласында алғашқы слет өткізу бастамасымен шықты.
Шығыста өтіп жатқан республикалық слет бүгін аяқталады.
Лаура Тілеубайқызы