ШҚО-да 2,5 мың шақырым жол жөнделеді
Шығыс Қазақстан облысында 5 жыл ішінде 2,5 мың шақырым автожол және 12 көпір жөнделеді.
Бұл туралы «Өзгерістер жолы: Әр азаматқа лайықты өмір» сайлауалды бағдарламасын орындау жөніндегі жол картасын талқылауға жиналған облыстық мәслихаттағы «Nur Otan» фракциясының депутаттары мәлімдеді.
Жиында өңір үшін перспективалы бағыттардың бірі туризмі екені де айтылды. Жол картасында туристік объектілерге инженерлік-коммуникациялық және көлік инфрақұрылымын дамыту (оның ішінде әуе және теміржол маршруттары желісін кеңейту) көзделген.
Сондай-ақ бес жыл ішінде бұқаралық спортты дамыту үшін жол картасы шеңберінде 11 дене шынықтыру-сауықтыру кешені және 6 спорт модулі салынады. Оған қоса жоба бойынша 2025 жылға қарай облыс тұрғындарын 100% сапалы ауыз сумен қамтамасыз ету жоспарланған.
Didar ақпарат
