Тоғыз бала сынақтан шеттетілген
![](https://didar-gazeti.kz/wp-content/uploads/2020/06/unnamed.jpg)
Облыс орталығында төрт «Алтын белгі» иегері ҰБТ кезінде тыйым салынған заттарды пайдаланбақшы болғаны үшін емтиханнан қуылды. Жалпы алғанда тоғыз бала сынақтан шеттетілген. Олардың барлығы қазақ мектептерінің түлектері.
– Екінші күні тағы бір қазақ мектебінің түлектері емтиханға айтылған уақыттан кешігіңкіреп келді. Себебін сұрағанымызда балалар алдымен мешітке кіріп шыққандарын айтты. Жеке-жеке емес, мектепке жиналып, директоры бар, барлығы автобуспен барған. Бір күн бұрын тағы бір мектептің түлектері арасынан сынақтан аластатылғандар болғанын естіген ғой. Бұл – сұмдық. Балалардың санасын улау деп санаймын. Оқушы тек өз біліміне ғана сенгені дұрыс. Мешітке барып, мінәжет ету арқылы ҰБТ тапсыруды алғаш көріп тұрмын. Бұл келеңсіздіктің түбіне балта шабу керек, – дейді ШҚМТУ 1-проректоры Сәуле Рахметуллина.
Өкініштісі, жастарымыздың жүректегі имандылық пен дінге көзсіз бас ұрудың аражігін ажырата алмауы. Оған мектеп басшылығының қолдау көрсетіп отырғаны, меніңше, тіпті өрескел.
Кәмал Естай