Татарстандық энергетиктер көмектесіп жатыр

Риддер жылу электр орталығындағы жөндеу жұмыстары бекітілген кестеге сай жүруде. Бұл туралы аталған қалаға кезекті рет іссапармен барып, нысанның қазіргі жағдайымен жіті танысқан аймақ басшысы Даниал Ахметов мәлім етті.

– Бәрі бекітілген кестеге сәйкес жүргізілуде. Үш қазандық толыққанды жұмыс істеп тұр. Олардың бірі – жоғары қысымды қазандық. Төртінші қазандық агрегатын жөндеу аяқталды, енді іске қосу және реттеу жұмысы жүріп жатыр. Бесінші қазандықта жабдықтар жөнделуде, – деді облыс әкімі.

Оның айтуынша, орталықтың барлық жабдығы әбден тозған, кәсіпорын иелері нысанды қауіпті жағдайға дейін жеткізген. Жылыту маусымына бірде-бір қазандық қондырғысы дайын болмай шыққан.

Қазір жөндеу бригадалары электр желісінен бастап барлығын қалпына келтіріп жатыр. Біздің мамандарға Татарстанның Қазан қаласынан келген энергетиктер белсенді көмек көрсетуде. Осылайша, жаңартылған үш қазандық қақаған аязда температура режимін сақтауға мүмкіндік беріп отыр.

– Орталықты сатып алу немесе коммуналдық меншікке беру туралы иелеріне екі рет ұсыныс жасадым, бұл бастама Үкімет тарапынан мақұлданған, – деп мәлімдеді аймақ басшысы.

 Ержан Кеңесұлы