Қар күрегендерге ыстық шәй ұсынды
– Облыс орталығындағы «Өскемен-Тазалық» мекемесінде 100-ден астам қызметкер жұмыс істейді. Олар сақылдаған сары аязда қала көшесінде қар күреп, аптап ыстықта қоқыс сыпырады. Біз сол кісілерге ыстық шәй мен тәтті-дәм ұсындық. Жастардың алғысының белгісі деп біліңіз, – дейді облыстық жастар ресурстық орталығының маманы Еркежан Досмұхамбетова.
Бұл – «Жылу сыйла» деп аталатын акция. Үрдіске айналып кеткен. Оны аталмыш орталық ұйымдастырып, іске асуына қаланың ерікті ұл-қыздары атсалысады.
– Суық күнде автобус тосу оңай емес. Сондықтан аялдамалардағы қарапайым халыққа да барымызды ұсынып, бір сәт көңілдерін ауладық, – дейді Еркежан.
Оның айтуынша эстафетаны барлық аудан мен қаланың жастары да жалғастырады. Тіпті «бүгін түстен кейін бастаймыз» деп, әзір тұрған өңірлер де баршылық.
– Шара бірінші кезекте санитарлық нормаларды сақтап, медициналық маска тағып, барлық ережені сақтай отыра ұйымдастырылады, – дейді маман.
Тасқын Болатұлы
