Жабайы жануарлар қолдан қоректендіріліп жатыр
Биыл біздің облыста жылдағыдай емес, қар қалың түсті. Осыған орай орман шаруашылықтары мен қорықтардың жұмысшылары жабайы жануарлар мен құстарды қыстан аман алып қалу мақсатында қоректендіру жұмыстарымен айналысып жатыр.
«Семей орманы» табиғи резерваты Бородулиха филиалының ұжымы ормандағы жабайы жануарлар мен құстарды қорғауға алып, биотехникалық іс-шараларды жүргізуде. Олар жабайы жануарлардың қыстық азығына арнап, 2500 дана байланған ағаштың жапырақты бұтақтарын, үш тонна шөп және астық қалдықтарын дайындаған болатын. Қазіргі уақытта бұл қорды жануарлар тұрақты және уақытша мекендейтін қары қалың түскен өңірлерге тасып, жеткізумен айналысуда.
Орманшылар еліктерді азықтандыратын 18 алаңқайды тазартып, 15 тұз салатын науаны, төрт жемшөп науасын орнатты. Қардың қалыңдығына байланысты жануарлар қозғалысына жол ашып, қолдан қоректендіріп, жемшөп беруде. Катонқарағай мемлекеттік ұлттық паркінде де осындай жұмыстар жүргізіліп жатыр.
