Өз ағашыңды отырғыз

Облыс орталығында «Өз ағашыңды отырғыз» акциясы жыл сайын жалғасып келеді. Өскемен қаласының әрбір тұрғыны өз ағашын отырғызып, оны күтіп-баптауға мүмкіндігі бар.

Өз үйінің ауласы, жол шеті, өзен жағасы болсын тал егіп, қаланы көркейте түсуге кез келген адам атсалыса алады.

Алма, қайың, үйеңкі ағаштарының көшеттерін облыстық табиғи ресурстар және табиғатты пайдалануды реттеу басқармасы тегін таратып отыр. Биыл қалаға 2 мың түп ағаш отырғызылыпты. Күзгі акцияның аясында Комендантка өзенінің арнасына 200 түп, Шығыс кентіне 500, мектептерге 400 түп ағаш отырғызылған. Көктем шыға Виноградов, Амурская, Потанин, Дзержинский, Молдағұлова, Добролюбов көшелері мен Тәуелсіздік даңғылының бойына егілген шыбықтар бүр жара бастайды.