Тракторшы куәлігі екі күнде табысталады
Ұлан ауданының тұрғындарына тракторшы-машинист куәлігі екі күннің ішінде беріледі. Бұл туралы аудандық ауыл шаруашылығы және кәсіпкерлік бөлімі хабарлады.
– Ауыл шаруашылығы бөлімінің көрсететін мемлекеттік қызметтерінің бірі – тракторшы-машинист куәлігін беру болып табылады. Аталмыш қызмет куәлікке тапсырыс берген күннен бастап екі жұмыс күні ішінде көрсетіледі. Жалпы, аталмыш қызметті аудан тұрғындары «Электронды үкімет» веб-порталы немесе тікелей біздің бөлімге келіп, өтініш беру арқылы да ала алады, – дейді аудандық ауыл шаруашылығы және кәсіпкерлік бөлімінің бас маманы Алмас Ерланұлы.
Бөлім маманы 17 жасқа толған мектеп оқушылары трактор жүргізушісі мамандығының теориясын оқыған соң, бөлімге келіп, емтихан тапсырып, үшінші санатқа дейінгі тракторшы-машинист куәлігін ала алатынын айтады. Бұдан бөлек, жүру жылдамдығы, жүк көтеру көрсеткіші жоғары техникаларды жүргізуге мүмкіндік беретін санаттарды алғысы келетін азамттар да бөлімге жүгіне алады.
Азамат Темірбеков
