Үш түрлі маска тігеді

Қалбатау ауылында «Бастау Бизнес» жобасының түлектері медициналық маска тіге бастады. Кәсіпкерлер палатасы Жарма аудандық филиалының директоры Дастан Мұқаев жас бизнесмендердің бұл іске кірісуіне дәріханаларда масканың жетіспеуі себеп болғанын айтады.

– Елде төтенше жағдай жарияланғаннан кейін, вирустан қорғайтын құрал-жабдықтардың жетіспеушілігі байқалды. Осыған орай, кәсіпкерлер палатасының мамандары ақылдаса келе, жеке кәсіпкерлерге ұсыныс айттық. Қазіргі уақытта бес кәсіпкер бетперде тігуді қолға алды. Олардың төртеуі «Бастау Бизнес» жобасын тәмамдаған көпбалалы аналар мен 29 жасқа дейінгі жастар, – деді Дастан Мұқаев.

«Бастау Бизнес» жобасы түлектерінің бірі – көпбалалы ана Матықан Қойшан. Ол жоба аясында 505 мың теңге грант алып, Қалбатау ауылында тігінхана ашқан.

– Тігіншілікті жас кезімде оқығанмын. Өзімнің сүйіп істейтін кәсібім. Былтыр жеке бизнес бастауға мүмкіндік алдым. Осы аралықта көп адамға құрақ құрап, көрпе тіктім. Қыздардың жасауын дайындадым. Басқа да тапсырыстарды орындадым дегендей… Қазір, сұранысқа байланысты, бетперде тігіп жатқан жайым бар. Күніне масканың екі түрінен 100 шақты данасын шығарып үлгереді екенмін. Бір адамға осы жетеді, – деді тігінші. Айтуынша, масканың бағасы 150 және 200 теңгеден.

Үш түрлі маска тігеді

Ал маска тігуді қолға алған, аталмыш жоба түлектерінен бөлек кәсіпкер – Анаргүл Қизат. Оның да тігінханасы аудан орталығында. Тігінханада Бұлбұл Разыханқызы екеуі жұмыс істейді.

– Біз үш түрлі маска тігіп жатырмыз. Мақтақағаз кездеме (хлопчатобумажная ткань), дәке және мата. Бағалары 100, 150 және 200 теңгеден. Тапсырыстар көбіне мекемелерден түсіп жатыр. Мәселен, бүгін балабақша мен әскери бөлімше қызметкерлері 40-50-ден алып кетті. Түс ауғанша барлығы 150-дей маска дайындадық. Кешке дейін де 50 шақты тігу жоспарда бар, – деген ол маска тігу ісін төтенше жағдай режимі алынғанға дейін жалғастыратындарын айтты.

Кәсіпкерлер палатасы аудандық филиалының жетекшісі Дастан Мұқаев ауданда алдағы уақытта тігін цехы ашылатынын жеткізді.

– Ашылатын цехқа, шамамен, сегіз тігін мәшинесін алмақпыз. Онда жұмыс істеуге осы «Бастау Бизнес» жобасының түлектері тартылады. Цехта әуелі ішкиімдер шығарылады деп жоспарлап отырмыз, – деді ол.

Тасқын Болатұлы