Перзент сүйем десеңіз…
Айна ЕСКЕНҚЫЗЫ
Былтыр «Аңсаған сәби» бағдарламасының арқасында өңірде көптен күткен 212 бала дүниеге келді.
Аймақта өткен жылы бала сүйе алмаған 792 жұп тіркелген. Квота бойынша 293 жұпқа экстракорпоральды ұрықтандырудың (ЭКҰ) рәсімі жүргізілді, 141 әйел аман-есен босанды. Қазір тағы 122 әйел экстракорпоральды ұрықтандырудан кейінгі жүктілік бойынша есепте тұр.
Биыл өңірде 777 бедеу жұп тіркелді. Олардың 239-ында “Аңсаған сәби” бағдарламасы аясында ЭКҰ алу мүмкіндігі бар, өйткені биыл өңірге сонша квота бөлінді. Мамандардың айтуынша, бағдарламаға кіру қиын емес.
–Пациент көмекші репродуктивті технологиялар бойынша қызмет көрсететін медициналық ұйымды МӘМС шеңберінде өз бетінше таңдайды. Содан кейін жоғары технологиялық медициналық қызметтер комиссиясының (ЖТМУ) қорытындысын алу үшін тіркелген жері бойынша өзінің учаскелік дәрігеріне жүгінуі қажет, – дейді ШҚО бойынша отбасын жоспарлау және репродуктивті денсаулық жөніндегі үйлестіруші Надира Слямханова.
Учаскелік дәрігер пациентті бедеуліктен зардап шегетін диспансерлік науқастардың (ЭРДБ) электрондық регистріне енгізеді. Тиісті тексеруден өткеннен кейін және бедеуліктің себептерін анықтағаннан соң 12 ай ішінде бейінді маманның қорытындысы негізінде учаскелік дәрігер МӘМС есебінен көмекші репродуктивті технологияларды жүргізу туралы мәселені шешу үшін пациенттің құжаттарын жоғары технологиялық медициналық қызметтер жөніндегі комиссияға жібереді. Оң шешім қабылданған кезде госпитализация бюросының порталында пациент құжаттардың толық пакетімен тіркеледі. Оған қызметтерді алудың күні мен уақыты айтылады.
Айта кетейік, биыл бұл қызметтерді еліміздің жеті өңірінде: Астана, Алматы, Шымкент қалаларында, Ақтөбе, Атырау, Жамбыл, Қарағанды облыстарында орналасқан 19-ға жуық медициналық ұйым МӘМС аясында тегін көрсетеді.
–Биыл қатысушыларға арналған бағдарламада 42 жасқа дейінгі шектеулер қарастырылған, өйткені әйелдер ресурстары туралы естен шығармау керек, жылдар өткен сайын аналық без қоры азаяды, – деп ескертті Надира Слямханова.
Маманның айтуынша, көп қиындықтан өтіп, ұзақ күткен жүктіліктің оң сынағын алу жеткіліксіз. Дәрігерлер үшін де, болашақ аналар үшін де жүктіліктің қауіпсіз аяқталуы маңызды, сондықтан әйелдер ЭКҰ-дан кейін босанғанға дейін мамандардың тұрақты бақылауында болады.
