IQanat ауылдан арманға жетелейді

Өскемен қаласында ауыл балаларына арналған IQanat олимпиадасының II кезеңі өтті. Интеллектуалды білім бәйгесіне Шығыс Қазақстан облысының барлық аудандарынан 308 оқушы жиналды. Айта кетейік, бүкіл Қазақстан бойынша бұл кезеңде он мыңға жуық бала білім бәйгесінде бақтарын сынады. Олимпиаданың алғашқы кезеңіне 50 мыңнан астам оқушы қатысқан болатын.

– Бүгін біз Өскемен қаласына IQanat мектебіне түсуді жоспарлап отырған ауыл мектептерінің оқушыларына қолдау көрсету үшін келдік. Ауыл балалары өте талантты және олардың жиі ашыла алмайтыны өкінішті. Бұл жобаны біз ауылдан шыққан дарынды оқушыларды қолдау, оларға тамаша мүмкіндіктер сыйлау мақсатында қолға алдық. Біз шалғайдағы шағын мектептерде де дарынды балалар бар екеніне назар аударуға тырысамыз, – деді IQanat қоры қамқоршысының көмекшісі Айгерім Айдарханова.

II кезең пәндерге негізделген. Үміткерлер логикалық ойлау, математикалық және оқу сауаттылығы бойынша үш міндетті бағыттан бөлек, ағылшын тілінен және таңдау бойынша тағы бір пәннен (математика, физика, биология, химия, Қазақстан тарихы, география) емтихан тапсырды.

Осы кезеңде іріктелген мың финалист IQanat мектеп-пансионатында тегін оқу және олимпиададан кейінгі үш жылдық қолдау бағдарламасына қатысу үшін бақ сынасады. Бұл бағдарлама ҰБТ мен халықаралық емтихандарға дайындықты, ағылшын тілін, ІТ дағдыларын, soft skills және кәсіпкерлік негіздерін қамтиды.

Біз екінші кезеңге қатысқан оқушылармен тілдесіп, пікірлерін білген едік. Күршім ауданындағы №3 Күршім гимназиясының оқушысы Айым Әділбекова IQanat олимпиадасы білімін тексеріп қана қоймай, жаңа дағдыларды дамытуға жағдай жасағанын айтты.

– Олимпиада барысында түрлі пәндер бойынша қызықты әрі күрделі тапсырмалар берілді. Олар логикалық ойлау қабілетімді шыңдап, терең білімнің маңыздылығын ұғынуға көмектесті. Сонымен қатар, олимпиада аясында білімге құштар көптеген оқушылармен танысып, олармен тәжірибе алмастым. Бұл жарыс менің білімге деген қызығушылығымды одан әрі арттырып, жаңа белестерді бағындыруға деген сенімімді нығайтты. Болашақта осындай зияткерлік сайыстарға жиі қатысып, өзімді дамытуға ниеттімін, – дейді Айым.

Ұлан ауданы Абай атындағы орта мектептің оқушысы Аяжан Қайырбекова «Peer to peer» жобасының өте пайдалы және өте қызықты болғанын атап өтті.

–Бізге әртүрлі сыйлықтар берді. Peer to peer жобасы өте пайдалы және өте қызықты болды. Тьюторлар сабақты қызықты әрі танымды өткізе білді. Сайыс әрине қиыншылық тудырды. Ол үшін ойлау қабілеті мен логика жақсы жұмыс істеу керек. Мен үшін логикалық ойлау қызықты болды. Бұл сайыс маған сенімділік берді, яғни бір турынан өткен сон мен талпынып, екінші турға дайындала бастадым, менің басқа да сайыстарға қызығушылығым ашыла бастады, – деп бөлісті оқушы қыз.

Самар ауданы Жамбыл атындағы орта мектептің оқушысы Шынар Айтқазықызына ойландыратын есептер мен шығармашылық тапсырмалар ұнапты. Айтуынша, тапсырмалар оған тек жаттанды білімнен гөрі, оны өмірде қалай қолдануға болатынын түсінуге көмектескен. Сонымен қатар, олимпиада арқылы көптеген дарынды оқушылармен танысып, тәжірибе алмасыпты. Дарынды қыз жарыс өзін жаңа қырынан танып, білімге деген ынтасын арттыруға ықпал еткенін жеткізді. Енді Шынар болашақта да осындай білім додаларына жиі қатысуды өзіне мақсат етіп отыр.

Жоба жеңімпаз атанбасаң да, үлкен мүмкіндіктер сыйлайды

Глубокое кентіндегі Оралхан Бөкей атындағы қазақ орта мектебінің 9-сынып оқушысы Фариза Рашқан IQanat Олимпиадасының үшінші деңгейіне дейін жеткен үміткерлердің бірі.

– Мен осы олимпиаданың финалисі және волонтерімін. Бұл жоба жеңімпаз атанбасаң да, үлкен мүмкіндіктер береді. Мен кәсіпкерлік негіздері, ағылшын тілі, ІТ дағдылары бойынша тегін курстарға қатысып жүрмін. Мұның барлығы болашағым үшін өте маңызды. Келешекте математика немесе физика пәндерінің мұғалімі болғым келеді, – дейді Фариза.

Биыл Олимпиада дәстүрлі білім сайысының шеңберінен шығып, жаңа Peer-to-Peer бастамасын іске қосты. Бұл бастама оқушыларды білім беру бағытындағы тәлімгерлік жүйесіне біріктіреді.

IQanat қорының түлектерін «аламник» деп атайды. Солардың бірі – Алиса Айтуғанова жаңа бағдарламаның мәнін былай түсіндірді:

– Бүгін шығысқазақстандық қатысушылар Peer-to-Peer жаңа жобасы бойынша дайындықты бастады. Бұл бағдарлама олимпиаданың екінші кезеңіне қарқынды даярлау мақсатында ашылған. Жобаның мәні – жоғары сынып оқушылары кіші сыныптағы қатысушыларға көмектеседі. Олимпиадаға алғаш рет қатысушылардың білім деңгейін көтеруге бағытталған. Бүгінгі шарада үш аламник пен алты волонтер оқушыларға қолдау көрсетуде. Біздің мақсатымыз – балалар үшінші кезеңге өтпесе де, осы турға қатысып, құнды тәжірибе жинақтағандарын түсінсе дейміз, – деді Алиса Айтуғанова.

Алисаның өзі қазақстандық кәсіпкерлермен мотивациялық кездесулер ұйымдастырады, сондай-ақ әр облыста бірнеше менторы бар. Бұл кездесулер оның дамуына және болашағына үлкен мүмкіндіктер сыйлайтынын атап өтті аламник.

IQanat Олимпиадасы – ауыл оқушыларына арналған бірегей мүмкіндік. Жоба түлектерінің 94%-ы әлемнің 17 еліндегі үздік университеттерге оқуға түседі.

Айна Ескенқызы