Емдеу кезеңдерін талдады

    Семей медицина университетінде «COVID-19 кезінде балалардағы мультиқоздырғыш синдромы»  тақырыбына оқыту семинары өтті. Практикалық денсаулық сақтау қызметкерлері үшін сабақты «СМУ» КЕАҚ балалардың инфекциялық аурулары кафедрасының меңгерушісі, жоғары санатты дәрігер Имдат Эфендиев, сондай-ақ кафедраның ассистенті, бірінші санатты дәрігер Анна Сутормина онлайн  форматта жүргізді.

Балалар мен жасөспірімдердегі COVID-19-бен уақытша байланысқан мультижүйелік қабыну синдромы, тағы бір атауы – Кавасаки-ұқсас синдромы – бұл SARS-CoV-2 вирусының әсерімен уақытша байланысты және аурудың ауыр және өмірге қауіп төндіретін ағымына әкелуі мүмкін жаңа синдром. COVID-19-бен байланысты мультижүйелік қабыну (МЖҚ) – бұл балалардағы коронавирустық инфекциядан кейінгі асқынулардың бірі болып табылады, ол иммундық жүйенің дұрыс жұмыс істемеуі, яғни ағзаның инфекцияға дұрыс жауап бермеуі деп түсіндіріледі және тамырлардың зақымдалуымен сипатталады.

– Пандемияның алғашқы кезеңдерінде көп қабыну синдромының алғашқы жағдайлары Ұлыбритания мен АҚШ-та  анықталды. Бірақ біздің аймақта КВИ жұқтырған алғашқы пациенттер, соның ішінде МЖҚ пайда бола бастаған кезде, біз қажетті терапия алгоритмдерін қолдандық. Емдеу кезінде біз иммуноглобулиндерді салдық. Бұл әдіс өзін толығымен ақтады, – деді Имдат Эфендиев көпжүйелі қабыну синдромының барлық қауіптілігін атап өткен кезде.

Сарапшы түсіндіргендей, MЖҚ белгілері коронавирустық инфекциядан кейін екі-алты аптада пайда болуы мүмкін. Балалардың жұқпалы аурулары кафедрасының ассистенті Анна Сутормина бұл жағдайды қалай анықтау керектігін, оның несімен қауіпті екендігін және, ең бастысы, науқасты қалай дұрыс емдеу керектігін айтып берді.

– MЖҚ негізгі белгілері – бұл  24 сағат бойы дене қызуының 38 градус болуы  немесе одан да жоғарылауы, іштің ауыруы, құсу, жүрек айну, диарея, жұтыну кезіндегі ауырсыну. Осыған ерекше назар аудару керек. MЖҚ кезінде ауыз қуысының шырышты қабатының жарасы, тыныс алу жеткіліксіздігі, лимфаоденопатия, жүрек ауруы, цианоз, ісіну және полиморфты бөртпе пайда болады, – деді ол.

Ұсынылған мәліметтерге сәйкес, асқазан-ішек белгілері балалардағы MЖҚ негізгі көріністерінің бірі болуы мүмкін. Оларда іштің ауыруы, құсу, жүрек айну, диарея, жұтыну кезінде кеуде тұсының ауырсынуы болуы мүмкін, клиникалық көрінісі жедел вирустық гастроэнтериттің көріністеріне ұқсас келеді.

Бауырдың зақымдануы симптомы жоқ кездегі биохимиялық қан анализіндегі трансаминазалар деңгейінің жоғарылауынан бастап бауырдың жедел зақымдануына, бауыр жеткіліксіздігіне, бауыр энцефалопатиясына, ауыр гипокоагуляцияға, ісіну-асциттік синдромға, аяқ астынан  венооклюзиялық аурудың пайда болуына дейін ушығады. Инфекционистер серозды перитониттің дамуын да жоққа шығармайды.

Анна Сутормина мультижүйелі қабынудың зертханалық және аспаптық диагностикасының қажетті алгоритмдерін ұсынды, бірақ, ең бастысы, сарапшылар осындай ауруы бар науқастарды емдеу кезеңдерін егжей-тегжейлі талдады. Этиотропты және патогенетикалық терапия алгоритмдері ұсынылды. Кездесудің соңғы бөлімінде инфекционистер семинарға қатысушылардың сұрақтарына жауап берді.

Флора Левина

Семей.