Экологиялық таза көлікке байқау жариялады

Облысымызда биылғы экологиялық мәдениет және қоршаған ортаны қорғау жылы аясында «ЭКОмобиль» атты балалар шығармашылығының байқауы басталды. Аталмыш байқаудың өткізілуіне «БИПЭК-Авто» және «Азия Авто» компаниялары мұрындық болып отыр.

– Кез келген баланың бойында әйтеуір бір іске икемділік болады. Біз осы байқау арқылы сондай дарынды балаларды таппақпыз. Қарап отырсаңыз, табиғатты сүймейтін бала жоқ. Күн, өзен, таулар мен ағаштарды балалардың әрбір суретінен кездестіруге болады. Сондықтан, балалар арасында «ЭКОмобиль» тақырыбында байқау ұйымдастыруды ұйғардық. Жас дарын иелерін экологияны қорғауға қатысты ойларымен бөлісуге шақырамыз, – дейді ұйымдастырушы топтың контент-менеджері Анна Кривощёкова.

Мамандардың айтуынша, байқауға ұсынылған экологиялық көліктің қолдан жасалған бұйымдар, бейнероликтер, суреттер және сызбалар түріндегі нұсқалары «БИПЭК-Авто» мен «Азия Автоның» инженер-құрастырушылар тарапынан қаралып, бағаланатын болады екен. Байқауға 2 мен 16 жас аралығындағы балалар қатыса алады.