Қасым Қайсенов кентінде емхана салына ма?
Облыстық қоғамдық кеңес мүшелерінің қатысуымен Ұлан ауданының орталығында емхана салу мәселесі талқыланды.
Ұлан аудандық қоғамдық кеңесінің төрағасы Мұхамеджан Рашидбектің айтуынша, орталық аудандық аурухана – Таврия ауылында. Егер Қасым Қайсенов кентінде емхана бой көтерсе, халық үшін өте ыңғайлы болар еді.
– Кенттегі амбулатория бес қабатты үйдің екінші қабатында. Медициналық көмекке жүгінетін тұрғындар қатары көп, – дейді Ұлан аудандық медициналық бірлестігі бас дәрігерінің орынбасары Индира Омарова.
Ал облыстық денсаулық сақтау басқармасы бастығының орынбасары Жанғазы Әліпбаевтың айтуынша бұл мәселе аудандық медициналық бірлестікпен қарастырылуда.
– Бірақ жақсы дәрігерлік амбулатория ғимаратын салғанымыз дұрыс шығар. Өйткені емхана – стандарт бойынша өте үлкен ғимарат. Оның үстіне мамандар да тапшы, – деп қосты Жанғазы Әліпбаев. Демек, емхана, әлде дәрігерлік амбулатория ғимараты салына ма? Бұл мәселе аудандық қоғамдық кеңестің келесі отырысында талқыланады.
Мерей Қайнарұлы