Ақпан келісімен аяз қысады

Ауа райын алдын ала болжап отыратын мамандардың айтуынша, қаңтарда күн жылы болғанымен ақпан туа аяз қысатын түрі бар.

Рас, ағымдағы жылдың алғашқы айындағы табиғаттың тосын мінезі бәрімізді таңырқатып тастады. Метеорологиялық орталық қызметкерлері де, былайғы жұртшылық та қаңтарда мұндай жылымықтың бұрын-соңды болғанын естеріне түсіре алмауда. Ал ауылдағы көнекөз қариялар бұл жағдайды келер жаздың құрғақ әрі ыстық болатындығымен байланыстырады.

Дегенмен, қаңтар айының соңын ала күн райы өзінің қалыпты ырғағына түсті. Облыс аумағында ауа температурасы түнде 25-30 градусқа төмендесе, кей жерлерде 35 градусқа дейін аяз қыспақ.