Қан орталығы екі айдан кейін пайдалануға берілуі тиіс

Облыс әкімі Даниал АХМЕТОВ Өскеменде салынып жатқан облыстық драма театры мен қан орталығында болып, нысандардағы құрылыс жұмыстарының бүгінгі жай-күйімен танысты. Сондай-ақ, аймақ басшысы Пушкин атындағы облыстық кітапханада болды.
Қаланы аралауды аймақ басшысы осы облыстық кітапханаға барудан бастады. Руханият ордасында бүгінде жағымды жаңалықтар көп. Ең алдымен, мұнда «Кедергісіз кітапхана» жобасы аясында мүмкіндігі шектеулі адамдарға барынша жағдай жасалған. Мәселен, арнаулы қызметтер залына 10 мың доллардың құрал-жабдықтары сатылып алыныпты. Сонымен қатар, кітапханада лифт жұмыс істейді.
– Кітапханамызды заман талабына сай жабдықтауға ерекше көңіл бөліп келеміз. Бүгінде түрлі бағытта білім беретін, атап айтқанда, компьютерлік сауаттылық, ағылшын, неміс, француз тілдері курстары өткізілуде. Баланың ой-өрісін кеңейтіп, танымдық қабілетін дамытуға көмектесетін роботты техника құрастыру курстары да келушілердің айрықша қызығушылығына ие. Сондай-ақ, кітапханамызда ойындар залы, IT-OTAU, кинозал мен жастардың зияткерлік орталығы бар, – деген кітапхана директоры Хабиба Ақжігітова облыс әкіміне электронды оқырман билетін тарту етті.
Аймақ басшысы кітапхана жұмысымен таныса келе, кітап қоры мен «Біздің Абай» электрондық орталығы туралы сұрастырды.
Бұдан кейін облыс әкімі Даниал АХМЕТОВ салынып жатқан облыстық драма театрына барады. Естеріңізге салайық, аймақ басшысы аталмыш құрылыс нысанына осыдан бір апта бұрын да барып, құзырлы мекемелер басшыларына тиісті тапсырмалар жүктеген болатын. Алайда, бұл тапсырмалардың дені әлі орындалмапты. Мысалы, өткен жолғы сапары барысында облыс әкімі театр құрылысына кем дегенде 200 адам жұмылдырылуы керек екенін айтқан болатын. Ал қазір мұнда 150-ге жетер-жетпес жұмысшы еңбек етуде. Жұмыс күшінің жеткіліксіздігін қатаң сынға алған аймақ басшысы мердігерлер мен қала басшылығына келесі аптаға дейін мәселені шешуді тапсырды.

– Өздеріңіздің күштеріңіз жетпесе, жұмысқа өзге құрылыс компаниялардың мамандарын тартайық. Мұнда атқарылатын шаруа әлі шаш-етектен. Сондықтан құрылысқа неғұрлым көп адамды жұмылдырғанымыз маңызды. Өткенде театр холдары мен фойелеріне қатысты біраз тапсырма берген едім. Соны әлі орындамапсыздар. Бұл – мәдени ошақ, мұнда келген адамдарға рухани демалып қайтуына барынша жағдай жасалуы тиіс. Бұл жердегі залдар да, дәліздер де, сатылар да, тіптен дәретханалар да кең әрі үлкен болуы керек. Мұндай ғимаратқа бір буфет те жетеді. Ал сіздер екеуін жоспарлап қойыпсыздар. Жалпы, ғимаратта бірталай бос кеңістік бар екенін байқадым. Қаптаған үлкенді-кішілі бөлмелер туралы тіптен сөз жоқ. Бұлардың бәрінде кім отырмақ? – деген облыс әкімі мердігерлерге бос кеңістіктерді мақсатты пайдалану, адамдар жиналатын холдарды кеңейту жөнінде тиісті тапсырмалар жүктеді.
Сондай-ақ, аймақ басшысы мердігерлерге Астанадағы опера және балет театрына барып, оның сәулет құрылысымен танысып қайтуды жүктеді.
Облыс әкімі Даниал АХМЕТОВ облыстық қан орталығына барғанда да мердігерлерге бірқатар тапсырма берді. Екі айдан кейін пайдалануға берілуі тиіс медициналық мекемеде бүгінде негізгі жұмыстардың бәрі аяқталған. Ғимарат бөлмелерін әрлеу жұмыстары біткен соң қажетті медициналық аппараттарды жеткізіп, орналастыру жағы қолға алынбақ. Аймақ басшысы қан орталығында атқарылған жұмыстар туралы есепті тыңдай келе, нысан құрылысына жұмсалған қаражаттың сомасы туралы ақпарат беруді сұрады. Алайда, бұл сұрақтың жауабына көңілі толмаған облыс әкімі келесі аптаның басына дейін медициналық мекеменің құрылысына бөлінген ақшаның қаншасы жұмсалып, қаншасы қалғаны жөнінде нақты мәліметтер беруді тапсырды.
– Тез арада қан орталығы құрылысына және қажетті медициналық аппараттарды сатып алуға жұмсалған қаражат мөлшері туралы ақпаратты қолыма тигізіңіздер. Қалған жұмыстарды аяқтауға қанша ақша керек? Осыны білгеннен кейін ғана жұмысты қаржыландыруды жандандыратын боламыз, – деді облыс әкімі Даниал АХМЕТОВ.
Қан орталығының бөлмелерін аралап көрген аймақ басшысы өзінің орынбасары Димитрий Гариков пен облыстық денсаулық сақтау басқармасының басшысы Вадим Овсянниковке, сондай-ақ, мердігер компания басшылығына бірқатар міндеттер жүктеді.
Нұржан Кенжеұлы