Қытай ғалымдарын құтқарып алды
Семейлік құтқарушылар қытайлық ғалымдардың қар құрсауынан шығуына көмек көрсетті. Олардың автобустары Семей қаласынан 910 шақырым қашықтықта тоқтап қалған, көлікте 6 адам болыпты.
Түнгі сағат 22.00 шамасында Семей қаласының ТЖБ қызметкерлері арнайы мамандандырылған көліктермен зардап шеккендерге қарай жолға шыққан. Құтқарушылар қар құрсауында қалған қытайлық азаматтарға жетіп, оларды жылыту орнына апарады.
– Сол күні қатты жел тұрып, жолды жауып тастады, ауа температурасы 20 градус суық болды. Көмек келгенге дейін жолаушылар қатты жаурап қалыпты, оларды жылытып, жылы көрпелер беріп, денсаулықтарын тексеріп шықтық, – дейді төтенше жағдайлар қызметкері Дмитрий Алябьев.
Істен шыққан көлікті суық түнде жөндеу мүмкін болмағандықтан, оны сүйреп апаруға тура келген. Сағат таңғы 6.30-да құтқарылған адамдар екі көлікпен Семей қаласына жеткізілген.
