Әйелдерге қандай құрмет көрсетілсе де жарасады

Салтанат

Кеше облыс орталығындағы Металлургтердің мәдениет үйінде облыс Әкімінің бірінші орынбасары Ермек Көшербаевтың қатысуымен Халықаралық әйелдер күніне арналған салтанатты жиын өтті. Бұл мерекелік шараға облысымыздың қоғамдық өміріне белсене атсалысып жүрген қыз-келіншектер жиналды.
Қоғамның түрлі саласында табысты жұмыс істеп жүрген әйелдер қауымына осы бір ерекше мейрам қарсаңында қандай құрмет көрсетілсе де жарасары сөзсіз. Бүгінде біздің қыз-келіншектер кәсіпкерлікті өрістету бағытында ер азаматтардан еш кем түсіп жатқан жоқ. Облысымызда «Бизнестің жол картасы – 2020», «Жұмыспен қамтудың жол картасы – 2020» бағдарламалары бойынша 5 мыңнан астам әйел өз жобаларын жемісті іске асыруда. Мемлекеттік қызметтің ауыр жүгін де нәзік жандар көтеріп жүр. Саяси мемлекеттік қызметшілердің 12 пайызын, әкімшілік мемлекеттік қызметшілердің 62 пайызын қыз-келіншектер құрап отыр. Мұнымен қоса, барлық деңгейдегі мәслихаттар депутаттарының 15 пайыздан астамы әйелдер қауымынан екенін де атап өткен жөн.
– Жарқын мерекенің қарсаңында өткізіліп отырған маңызы жоғары іс-шара аясында өздеріңізбен жүздескеніме қуаныштымын. Мұхтар Әуезов «Ана бір қолымен бесікті, екінші қолымен әлемді тербетеді» деп толғанған. Расында, адамзат өмірінің іргетасы сіздердің қолдарыңызбен қаланады. Сіздер отбасы берекесін сақтаумен бірге, Тәуелсіздікті нығайту ісіне де еселі үлес қосып, бейбіт тірлік пен бірліктің, тыныштық пен тұрақтылықтың, жарқын болашаққа деген сенімнің, ізгілік пен мейірімділіктің ұйтқысы болып келесіздер.
Қымбатты ақ жаулықты аналар, қарындастар! Сіздерді келе жатқан мерекелеріңізбен шын жүректен құттықтаймыз! Сіздерге және отбасыларыңызға мол береке, бақыт, шаттық, мықты денсаулық, жақсы көңіл-күй тілейміз, жылдан-жылға табиғаттың тамаша мерзімі көктемдей құлпырып, жасара беріңіздер! – деді аймақ басшысы атынан әйелдерді меркелерімен құттықтаған облыс Әкімінің бірінші орынбасары Ермек Көшербаев.
Салтанатты жиын барысында еңбегі елге сіңген бір топ әйелге құрмет көрсетілді. Осы Қазақстан Республикасы Президенті жанындағы отбасы-демографиялық саясат және әйелдер ісі жөніндегі ұлттық комиссия төрағасының Алғыс хаттары «Алтын-ай» мүгедек әйелдер қоғамдық бірлестігінің төрайымы Мағиза Мирвазетдиноваға және Семей қаласындағы №5 аралас типтік емхананың бас дәрігері Зәуре Жұмагелдинаға табыс етілді.
Сонымен қатар, белсенді азаматтық ұстанымдары және Шығыс Қазақстан облысын дамытуға қосқан үлестері үшін «Экономикалық лицей» мемлекеттік мекемесінің директоры Нәйля Хамидуллина мен ішкі істер департаменті тергеу басқармасы бөлім басшысының орынбасары, полиция подполковнигі Елена Горошанская, көп жылғы адал еңбектері мен белсенді азаматтық ұстанымдары үшін Бесқарғай аудандық медициналық бірлестігінің дәрігері Сәуле Қайырханова, Глубокое ауданындағы қоғамдық-саяси өмірге белсене қатысушы үй шаруасындағы әйел Майра Кәкімова, Үржар ауданы жер қатынастары бөлімінің басшысы Дариға Жаркенова, облыс бойынша қаржы полициясының бас маманы Ләйлә Ысқақова, облыстық прокуратураның аппарат басшысы Аяна Құдабаева облыс Әкімінің Алғыс хатымен марапатталды.
Осы жиынның қарсаңында өткен «Аяулы жас келін» облыстық байқауының үздіктері де марапатталды. Алғашқы үш орынды өзара бөліскен жеңімпаздарға облыс Әкімінің арнайы сыйлықтары табысталды.

Ержан Әбіш