ШҚО-дағы «сақалды» құрылыстар пайдалануға қашан берілмек?
Бұл өзекті мәселе ШҚО Қоғамдық кеңесі жанындағы Сыбайлас жемқорлыққа қарсы іс-қимыл комитетінің жаңартылған құраммен өткізген алғашқы отырысында жан-жақты талқыланды. Комитет жетекшісі Әнуарбек Мұхтархановтың төрағалығымен өткен жиында Катонқарағай ауданындағы «сақалды» құрылыстардың барысынан бөлек туризм саласындағы жемқорлық тәуекелдеріне сыртқы анализ қорытындылары және әлеуметтік маңызы бар азық-түлікті сату мәселелері сөз болды.
Шығыс Қазақстан облысы бойынша сыбайлас жемқорлыққа қарсы іс-қимыл департаменті басшысының бірінші орынбасары Асылхан Ашиков комитет мүшелерінің жұмысына сәттілік тілеп, былтыр атқарған жұмыстарына қысқаша тоқталды.
Асылхан Амангелдіұлының айтуынша, өткен жылы Комитет сегіз отырыс өткізіп, онда отыз ұсыныс дайындалды. Жыл бойы олардың барлығы іске асырылып, орындалған. Бұл Комитет жұмысының тиімділігін көрсетеді.
– Отырыстарда өңірдің мәселелерін қамтыған әртүрлі тақырыптар көтерілді. Оның ішінде құрылысы ұзаққа созылған нысандарды тезірек аяқтап, пайдалануға беруден бастап, аумақтарды көркейту, әлеуметтік саланы дамыту сияқты мәселелер бар. Комитет әр мүмкіндікті пайдаланып, мемлекеттік органдар мен жергілікті билік органдарынан деректер алу жолдарын жетілдірді. Бұл ұсыныстар мен деректерге негізделген нақтылы шешімдер қабылдауға мүмкіндік берді. Мұндай тиімді жұмыс келешекте де жалғасын табады. Алдағы уақытта да жұмыстарыңызға сәттілік тілеймін, – деді Асылхан Ашиков.
Өңірде құрылысы үш-төрт жылға созылып кеткен бірнеше нысан бар. Антикоррупциялық қызмет, «Аманат» партиясы және қоғам белсенділері бұл нысандарды бірнеше рет аралағанын айта кеткен жөн. Сондай проблемалық нысандардың екеуі Катонқарағай ауданында салынып жатыр. Аудан әкімінің орынбасары Расул Карабалиновтың хабарлауынша, Топқайың ауылындағы су құбырлары жүйелерін қайта құрастыру 2021 жылы басталып, 2024 жылдың маусымында аяқталуы тиіс болатын. Алайда, құрылыс жұмыстары тек 80%-ға орындалған. Қалған жұмыстарға сорғы станциясына жабдық орнату, аумақты абаттандыру және іске қосу-реттеу шаралары кіреді. 2024 жылдың шілдесінде жұмыстар қайта жанданса да, қазіргі таңда тағы да тоқтап тұр. Әкімнің орынбасары жоба 2025 жылдың 30 маусымында толық аяқталып, пайдалануға беріледі деп сендірді. Катонқарағай ауылындағы дене шынықтыру-сауықтыру кешенінің құрылысына келсек, бұл жоба 2020 жылы басталып, 2025 жылы аяқталуы тиіс. Қазір құрылыстың 95%-ы орындалды. Дегенмен, электр қуатына қарыздың болуына байланысты желдету жүйесін сынақтан өткізу мүмкін болмаған. Сонымен қатар, ауа райының қолайсыздығына байланысты абаттандыру жұмыстары толық аяқталмаған. Расул Мырзабекұлы бұл нысан да 30 маусымда іске қосылатынын айтты.
Облыстық құрылыс, сәулет және қала құрылысы басқармасы басшысының орынбасары Саят Тойкенов «сақалды» құрылыста жұмыстар баяу әрі үзіліспен жүріп жатқанын мойындады.
– Мердігер барлық проблемалық құрылыс нысандарына бірдей ресурс бөле алмады. Нәтижесінде «алдымен тез аяқталатын нысандарды бітірейік» деген тәсілмен Топқайын ауылындағы су құбыры, Катондағы және Тавриядағы дене шынықтыру-сауықтыру кешендерін аяқтауға күш салды. Сондай-ақ Бозанбай ауылында да бір нысанның құрылысы аяқталуға жақын, – деп хабарлады Саят Тойкенов.
Басқарма басшысының орынбасары түсіндіргендей, құрылыстардың кешігуіне түрткі болған тағы бір түйткілді мәселе – бас мердігер «QazConstructions» компаниясына қатысты жағдай. Компания басқа бір облыста лицензиясынан айырылғандықтан, біздің өңірде жұмысын жалғастыру мүмкін болмаған. 14 наурызда лицензиясын қайта алған «QazConstructions» енді ғана жұмысты жалғастыруға мүмкіндік алды. Саят Ерланұлы Марқакөл мен Үлкен Нарын ауылдарындағы дене шынықтыру-сауықтыру кешендерін жыл аяғына дейін пайдалануға беретіндеріне сендірді.
Мұндай сенімсіз мердігерлер халықтың билікке деген сеніміне кері әсер етуі мүмкін. Сондықтан комитет мүшелері алдағы уақытта халықтың билікке деген сенімін сақтау үшін әлеуетті мердігерлермен жұмысты күшейту қажеттігін атап өтті.
– Тұрғындарға әлеуметтік маңызы бар азық-түлікті сатуда біраз шешілмеген мәселелер бар. Алдағы уақытта комитет мүшелері мен антикор қызметінің мамандары бірлесе мониторинг жүргізіп, бұл мәселеге қайта ораламыз, – деп қорытындылады Комитет жетекшісі Әнуарбек Мұхтарханов.
Айна Ескенқызы
