Паром өткелінің жұмысы қызып тұр – ШҚО
Қазіргі уақытта Күршім, Зайсан аудандары халқының облыс орталығымен көлік байланысы «Қызыл ту» паром өткелі есебінен қамтамасыз етіледі.
Паром өткелінің үздіксіз жұмыс істеуі әлеуметтік-экономикалық маңызға ие. Сондықтан ШҚО жолаушы көлігі және автомобиль жолдары басқармасы тарапынан оның жұмысына ерекше назар аударылады, деп хабарлайды Didar ақпарат.
Өткел арқылы Өскемен қаласынан Күршім ауданына дейінгі тікелей автомобиль жолының ұзындығы – 205 шақырым. Алтай және Зайсан қалалары арқылы өтетін ұзындығы 400 және 665 километрді құрайтын айналма жолдар – Күршім ауданына балама жолдар, бұл тиісінше тасымалдау уақыты мен шығындарына айтарлықтай әсер етеді.
«Қызыл ту» паром өткелі 1963 жылдан бері жұмыс істейді. Іске қосылған сәттен бастап жолаушылар мен автокөлік құралдарын өткел арқылы тасымалдауды 1962 және 1964 жылдары Тюмень кеме жасау зауытында жасалған «Ертіс» және «Күршім» дизель-электрөткізгіш паромдары жүзеге асырады. Дайындаушы зауыт аталған паромдарды Бұқтырма су қоймасында жұмыс істеу үшін арнайы климаттық жағдайларды ескере отырып құрастырған. Паромдардың техникалық сипаттамалары бірдей, бір паромның жүк көтергіштігі – 185 тонна, жолаушылар сыйымдылығы – 212 адам немесе 50 жеңіл автокөлік.
2018 жылға дейін паромдарды күтіп ұстау және олардың жұмыс істеуі бюджет қаражаты есебінен жүзеге асырылды. Бүгінгі таңда бюджетке түсетін жүктемені азайту және тиімді басқару мақсатында паром өткелінің қызметі жолаушылар мен автокөлік құралдарын тасымалдауды ұйымдастыру бойынша міндеттемелерді жауапкершілікпен орындайтын «Облшығысжол» ЖШС компаниясына берілді.
– Паром өткелін пайдалану кезіндегі басты міндеттердің бірі – «Ертіс» және «Күршім» паромдарын техникалық жарамды күйде ұстау, қозғалыс кестелерін сақтау және тасымалданатын азаматтардың қауіпсіздігін қамтамасыз ету. Пайдаланылатын паромдар штаты білікті мамандармен жасақталған, қазіргі уақытта 45-тен астам адам жұмысқа орналастырылған. Жұмыс барысында туындайтын техникалық немесе климаттық проблемаларға қарамастан, халықтың көлік қатынасына деген қажеттілігін қанағаттандыру үшін жедел шаралар қабылданады, – дейді «Қызыл ту» паром өткелінің басқарушысы Қадылбек Жармұхамбетов.
Бұқтырма су қоймасында мұз еру басталысымен жыл сайын «Қызыл ту» өткелінің жұмысы қайта басталады. Жазғы уақытта паромдардың қозғалысы сағат сайын таңғы 6-дан кешкі 9-ға дейін, қыста таңғы 7-ден кешкі 8-ге дейін жүзеге асырылады. Жылына орта есеппен 80 мыңнан астам автокөлік құралына немесе 240 мыңға жуық жолаушыға паромдар қызмет көрсетеді. Автокөлік құралын тасымалдаудың ең төменгі тарифі 1500 теңгені құрайды, автокөлік құралының түріне байланысты тариф өзгереді. Жолаушылардың өздерін тікелей тасымалдау – тегін.
Өңірде 2020 жылдан бастап Бұқтырма су қоймасы арқылы көпір салу бойынша ірі инфрақұрылымдық жоба жүзеге асып жатқанын айта кету керек. Құрылыс аяқталғаннан кейін жаңа көпір «Ертіс» және «Күршім» паромдарын пайдалану қажеттілігін алмастырып, Күршім, Катонқарағай және Зайсан аудандарының тұрғындары мен қонақтары үшін жыл бойы көлік қатынасының болуына мүмкіндік бермек.
