Өзге ұлтты әскерилер мемлекеттік тілден байқауға қатысты

Өскеменде «Мемлекеттік тіл – менің тілім» сайысының ІІ кезеңі өтті. Бұл шара Ұлттық Ұланның “Шығыс” өңірлік қолбасшылығының ұйытқы болуымен жыл сайын ұйымдастырылады.

-Сайыстың негізгі мақсаты – мемлекет тарапынан жүргізіліп жатқан тілдік саясатты жүзеге асыру, насихаттау. Күнделікті жауынгерлік қызметте, қарым-қатынаста мемлекеттік тілдің қолданыс аясын кеңейту. Одан қалды, мемлекеттік тілді үйренуге құлшыныс білдіріп жүрген әскери қызметшілерді ынталандыру,- дейді Ұлттық ұлан Бас қолбасшылығының отставкадағы подполковнигі Ботагөз Рыспаева.

Жарысқа Павлодар, Абай және Шығыс Қазакстан облыстарынан келген 7 бірдей өзге ұлтты әскери қызметкер қатысты. Алғашқы кезеңде қатысушылар өздерін таныстырды. Одан кейін сайысқа қатысушылар мақал-мәтелдер айтып сынға түсті. Шешуші «Өрлеу» кезеңінде арнайы сахналық қойылым қойды.

-Біздің ана тіліміз, қазақ тіліміз – мәдени және рухани азығымыз. Сондықтан да оның әр қоғамдық қарым-қатынаста белсенді қолданып, одан қалды жандандыруға арналған кешенді шараларды жүзеге асыратын болсақ, біз үшін үлкен міндет және парыз-дейді Ботагөз Тайшыбекқызы.

Сайысқа қатысушылардың бірі Павлодардағы 6679 әскери бөлімінің командирі, кіші сержант Николай Капитулин. Ол қазақ тілін бала кезінен жетік меңгерген. Оның пікірінше, әр азамат мемлекеттік тілді құрметтеуі тиіс.

-Әскерде керек, негізі. Мен өзім ауылда үйрендім. Қазір әскерде оны ары қарай жетілдіріп, меңгеріп жатырмын. Әскерге жан-жақтан келеді. Солдаттар келеді. Оңтүстіктен келеді, бүкіл Қазақстаннан келеді. Солардан үйренесін-дейді ол.

Екінші кезеңнің жеңімпаздары қыркүйек айында өтетін республикалық байқауға жолдама алды. Дәстүрлі сайыстың жеңімпаздары алдағы республикалық байқауда бақтарын сынайтын болады.

Бағдат Амангелді,
“Шығыс” өңірлік қолбасшылығы
баспасөз қызметі бастығы