Өскеменде шілдеден бастап тарифтер өседі
Өскеменде шілде айының басынан бастап коммуналдық қызметтерге тарифтер өседі.
“Тарифті инвестицияларға айырбастау” қағидаты Өскеменде қалай жұмыс істейтін болады және 2023 жылдың 1 шілдесінен бастап не өзгереді. Бұл туралы ҚР ҰЭМ Табиғи монополияларды реттеу комитетінің Шығыс Қазақстан облысы бойынша департаментінде айтып берді, деп хабарлайды Didar ақпарат.
“Тарифті инвестицияларға айырбастау” бағдарламасы мүлік иелері есебінен салаға инвестициялар тартуды, табиғи монополиялар саласындағы қызметкерлердің жалақы деңгейін көтеруді, табиғи монополиялар саласына озық инновацияларды енгізуді ынталандыру арқылы одан әрі реттеуді көздейді”.
“Тарифтік саясатты реформалау аясында инженерлік инфрақұрылымды жаңарту бойынша жұмыс басталады. Бүгінгі таңда жөндеу жұмыстарын ұлғайту, өңірдегі орта салалық деңгей бойынша қызметкерлердің жалақысын өзгерту, иесіз желілер мен жабдықтарды қамтамасыз ету шығындарын өтеу үшін тарифтерді өзгерту және қолданыстағы инвестициялық бағдарламаларды ұлғайту үшін құқықтық негіздер қалыптастырылды”, – деп хабарлады департаментте.
Департаментте қызыл және сары аймақтағы желілердің тозу деңгейі бойынша “Өскемен ЖЭО” ЖШС-ның тозу деңгейі 67%, “Согра ЖЭО” ЖШС-нікі 63%, “Өскемен жылу желілері” АҚ-нікі 65% және “Өскемен Водоканал” МКК-нің сумен жабдықтауы 62% және су бұру желілері 81% екенін атап өтті.
Департамент ШҚО бойынша құрылыс, энергетика және тұрғын үй-коммуналдық шаруашылық басқармасымен бірлесіп, жоғарыда аталған коммуналдық кәсіпорындардың 2023 жылға арналған инвестициялық бағдарламаларын өзгертуге өтінімдерді қарады. Ұсынылған өтінімдер бойынша 29 мамыр мен 5 маусымда тарифтік саясат жөніндегі кеңес жанындағы Табиғи монополиялар салаларындағы тариф белгілеу мәселелері жөніндегі өңірлік комиссияның кезекті отырыстары өткізді.
“Ұсынылған іс-шараларды қарау кезінде объектілердегі авариялылықтың және тозудың ағымдағы жай-күйі, сондай-ақ жөндеу жұмыстарын жүзеге асыруға дайындық кезеңі (ЖСҚ, сараптама қорытындысының болуы сияқты) бағаланады, тиісінше негізгі құралдардың тозуына әсер етпейтін іс-шаралар алынып тасталды.
Инвестициялық бағдарламалардың қосымша іс-шараларының сомасы: “Өскемен ЖЭО” ЖШС – 1 млрд теңге, “Согра ЖЭО” ЖШС – 453 млн теңге, “Өскемен жылу желілері” АҚ – 1 млрд теңге, “Өскемен Водоканал” МКК – 2023 жылға арналған бірінші кезең 64 млн теңге және 2024 жылғы екінші кезеңге 1,73 млрд теңге.
Бұл қаражат табиғи монополиялар субъектілерінің желілері мен жабдықтарын реконструкциялауға және жаңғыртуға бағытталатын болады, бұл 2023 жылы кәсіпорындар бойынша тозудың орта есеппен 2%-ға төмендеуіне алып келеді.
“ТҮКШ саласындағы кәсіпорындардың негізгі қаражатын қайта құру және жаңғырту тариф есебінен, сондай-ақ жергілікті бюджеттен қаражат тарту арқылы жүргізіледі деп жоспарлануда. Бұл іс-шаралар желілердің, жабдықтар мен қазандық агрегаттарының жағдайын жақсартуға, коммуналдық қызметтерді үздіксіз көрсетуді қамтамасыз етуге, көрсетілетін қызметтердің сапасы мен сенімділігін арттыруға мүмкіндік береді. Сонымен қатар, қосымша тартылған инвестицияларды мақсатты пайдалану есептерді қарау шеңберінде де тексерілетін болады”, – деді мекемеде.
Жалпы, ведомствоның мәліметінше, жылумен жабдықтау, сумен жабдықтау және су бұру саласындағы тарифтердің өсуі халық үшін 10%-ды, өзге тұлғалар үшін 20% -ды құрайды және тарифтердің өсуінің негізгі жүктемесі бюджеттік ұйымдарға тиесілі болады.
“Жүргізіліп жатқан жұмыстар негізгі құралдардың тозуын, апаттық жағдайлардың санын азайтуға және Өскемен қаласының коммуналдық қызметтерін көрсету сапасын арттыруға мүмкіндік береді. Бұдан басқа, “Тарифті инвестицияларға айырбастау” бағдарламасын іске асыру шеңберінде халықтың мұқтаж топтарын, оның ішінде тарифтың өсуі күтілгенін ескере отырып, тұрғын үй көмегін көрсету арқылы қолдау көзделетін болады”,- деп мәлімдеді ҚР ҰЭМ Табиғи монополияларды реттеу комитетінің ШҚО бойынша департаментінде.
