«Нұрлы болашақ» бір айға созылады

А.Пушкин атындағы облыстық кітапханада 1 маусым – Халықаралық балаларды қорғау күніне орай «Нұрлы болашақ» республикалық акциясының ашылу салтанаты өтті. Білім және ғылым министрлігінің тапсырмасы бойынша жүзеге асырылып жатқан шара 15 маусымға дейін жалғасатын болады.

Акцияның ашылуы барысында кітапхана ұжымы жиналған қауымды 15 мамыр – отбасы күнімен құттықтап, балаларды жазғы демалыс уақытын бірге өткізуге шақырды. Сондай-ақ кішкентай оқырмандарға арналған интеллектуалды ойындар, көрмелер, шығармашылық шеберханалар, ғылыми тәжірибелер ұйымдастырылды.

− «Нұрлы болашақтың» мақсаты балалардың құқықтарын қорғау мәселесіне қоғамның назарын аудару. Біз олардың бос уақытын қызықты әрі тиімді өткізуіне өз үлесімізді қоссақ дейміз. Алдағы бір ай ішінде жас оқырмандар үшін қазақ және орыс тілдерінде көптеген шаралар өтетін болады, − дейді кітапхана қызметкері Азия Шомбина.

Кітапхана ұжымы бұл күннің ерекше өтуіне барынша атсалысқан. Квест ұйымдастырушы Мария Яковлева арнайы осы акцияға тапсырмалар дайындаған. Оның айтуынша, квест бұл – соңғы уақытта жастар арасында кеңінен танылған ойын түрі.

– Мұндай ортада квестті алғаш рет өткіздік. Болашақта кітапханамен тығыз байланыс орнату жоспарда бар, − дейді ол.

Ерікті Мариана Исмайылова бүлдіршіндердің кітап оқуға деген қызығушылығын ояту үшін отбасылық кітап оқу клубын ашқан. Мұнда ата-аналар балалармен бірге кітап оқып, танымдық ойындар ойнауына болады.

− Бүгінгі күннен жақсы әсер алдым. Әсіресе мобильді планетарий өзіме қатты ұнады. Бос уақытымда достарыммен осында келетін боламын, − дейді 4-сынып оқушысы Назерке Кеңесқазина.

Акция аясында «Жұмбақтар сыр шертеді» ителлектуалды ойыны, «Ғажайып ғарыш» планетарийдегі танымдық сабақтар, «Жаттығамыз, секіреміз, жүгіріп» эстафетасы, интерактивті үстелде «Сам себе учитель» оқыту сабағы, «Кітаппен өткен жаз қызық» кітаптар көрмесі, шахмат және үстел ойындары, «100 затей для детей» танымдық ойын-сауық бағдарламалары ұйымдастырылады деп жоспарлануда.

Алтынай Бақытжан