Үлкен Нарындағы атыс

Үлкен Нарындағы атыс

Үлкен Нарын ауылында жергілікті тұрғындар мен полицей арасында отты қарудан атыс болып, бір адам қаза тапты.
Ауылдағы 1985 жылы туған тұрғын 1990, 1980, 1977 жылы туған үш жергілікті тұрғынның өзіне қарулы шабуыл ұйымдастыруынан зардап шеккен. Алдын ала мәлімет бойынша, оған көмекке полицей келіп, оқ атуға мәжбүр болған. Атыс туралы мәліметті облыстық ІІД растап отыр.

– Катонқарағай ауданы орталығы Үлкен Нарын ауылында бірнеше адам осы ауылдың тұрғынына дене жарақатын салған. Ол полицияда істейтін ағасының көмегіне жүгінген. Жәбірленуші мен полицей бұзақыларды ауылдағы көлік жөндеу бекетінен тапқан. Қарулы адамдарға полицей жақындай бергенде, бұзақылардың бірі жәбірленушіге оқ атып, аяғын жаралаған. Екінші бұзақы суық қаруды полицейге сілтеген. Жағдайдың ушыққанын байқаған полицей оның алдын алу мақсатында алдымен ескерту ретінде оқ атқан. Оған құлақ аспаған бұзақыларды тәртіп сақшысы табельдік қарудан оқ атып, жаралаған. Олардың бірі ауруханада қайтыс болды. 1977 жылы туған үшінші адам оқиға орнынан қашып кетіп, жедел іздестіру шаралары барысында ұсталды, – деді облыстық ІІД баспасөз қызметінің жетекшісі Бақытжан Торғаев.

Облыстық прокуратурада өткен брифингте айтылғандай, осы факт бойынша ҚР ҚК-нің 293-бабы, 3 бөлігі «Бұзақылық», ал, полиция қызметкеріне қатысты ҚР ҚК-нің 102-бабы «Қажетті қорғаныс шегінен шығу кезінде жасалған кісі өлтіру» бойынша сотқа дейінгі тергеу басталды. Кейіннен АІІБ қызметкерінің әрекеттері кісі өлтіру, яғни, ҚР ҚК-нің 99-бабына қайта сараланған. Себебі, ол бұл жөнінде АІІБ хабар бермеген, жедел-тергеу тобын шақырмаған. Тек өз бетінше әрекет еткен. Ол ұсталып, оған қатысты, «қамауға алу» түрінде бұлтартпау шарасы қолданылды.

– Қоғамдық резонансты ескеріп, объективті тергеу жүргізу мақсатында, облыс прокуратурасы ІІД-мен бірлесіп, облыс прокуратурасының арнайы прокуроры басшылық ететін ведомствоаралық тергеу-жедел тобын құрды. Сондай-ақ, іс бойынша процессуалдық прокурор тағайындалды (Катонқарағай ауданының прокуроры), – облыс прокурорының орынбасары Нұрлан Бижанов.

Брифинг барысында облыстық ІІД бастығының орынбасары Ерлан Жұмаділовтің айтуынша, аталған полицей бұған дейін тек жақсы қырынан танылып келген. Ал Нұрлан Бижанов қаза тапқан Үлкен Нарын ауылының тұрғыны бұрын қылмыстық жауапкершілікке тартылғанын айтады.
Қазіргі кезде қажетті тергеу әрекеттері жүргізілуде. Тергеу барысы облыс прокуроры мен ІІД- бастығының ерекше бақылауына алынған.

Дәурен Аллабергенұлы