Күн энергиясын қолданушыларға субсидия береді

Келер жылдан бастап ел Үкiметі ауыл шаруашылығы саласында күн энергиясын қолдану үшiн 50 пайыздық субсидия бөлуді жоспарлап отыр. Бұл туралы «Astana Solar» ЖШС-нің бас директоры Вячеслав Советский мәлiм еттi.

– Келер жылы агросекторға қолдау күшеймек. Мемлекеттiк қолдаудың үлкен пакеттер жүйесi әзiрленген, үкiмет қаулысының бiрiнде дәстүрлi электр энергиясы жоқ жерлерде 5 киловаттық күннен қуат алатын шағын станциялар құрылысын жүргізуді субсидиялау көзделген. Субсидия көлемі 50 пайызды құрайды. Егер 5 киловаттық күн станциясын iске қосу шамамен 4,5 млн. теңгенi құраса, оның тең жартысы бюджеттен өтеледі. Бұл шаруа қожалықтарына көрсетілетін көмек, – дейдi В.Советский.

Естеріңізге сала кетсек, «Astana Solar» ЖШС – «Қазатомөнеркәсіп» компаниясының 100 пайыздық еншiлес кәсiпорны. Ол мемлекеттiң қалпына келтiрiлетiн энергияға байланысты стратегиялық тапсырмаларын орындау мақсатында құрылған.