Қаңтардағы ҰБТ-ға тіркеу басталып кетті
Қапы қалып жүрмеңіздер, қаңтарда өтетін ҰБТ-ға қатысуға өтініш қабылдау басталып кетті. Өтініш қабылдау 20 желтоқсанда басталып, 6 қаңтарға дейін жалғасады. ҰБТ-ға тіркелу Ұлттық тестілеу орталығының app.testcenter.kz. сайтында жүргізіледі.
Қазіргі кезде бәрі ашық әрі әркімнің мүмкіндігіне орайластырылған. Сондықтан ҰБТ-ға тіркелуші тестілеу өткізілетін орынды, күнді және уақытты өздері таңдайды. Ал Ұлттық тестілеу орталығының хабарлауынша, ҰБТ-2023 форматында өзгеріс жоқ. Алайда «Қазақстан тарихы» (20 сұрақ) және «Оқу сауаттылығы» (15 сұрақ) пәндерінің тест тапсырмалары санына өзгерістер енгізілді. Осылайша, Қазақстан тарихынан 20, оқу сауаттылығынан 15, математикалық сауаттылықтан 15 және екі бейінді пән бойынша 35 тест тапсырмасы ұсынылады.
– Қаңтардан бастап «информатика мұғалімдерін даярлау», «ақпараттық технологиялар», «ақпараттық қауіпсіздік» білім беру бағдарламалары топтарына түсушілер ҰБТ-ны «Математика-Информатика» комбинациясы бойынша тапсырады. Тестілеуге дайындықты жақсарту мақсатында біз оқу жылының басында информатика бойынша ҰБТ-да кездесетін терминдер тізімін жарияладық. Тестілеу барысында қазақ тілінде тапсырушылар үшін терминдердің орысша және ағылшынша, орыс тілінде тапсырушыларға қазақша және ағылшынша, ағылшынша тапсырушыларға қазақша және орысша аудармасы ұсынылады. Сондай-ақ барлық талапкерлер үшін тестілеуде компьютер экрандарында калькулятор, Менделеев және ерігіштік кестесі қолжетімді болады, – деді Ұлттық тестілеу орталығының директоры Руслан Емелбаев.
Ұлттық бірыңғай тестілеудің ұпай саны мен уақытында өзгеріс жоқ. Бұрынғыдай барлығы – 120 тапсырма. Ең жоғары ұпай – 140. Тестілеудің жалпы уақыты – 4 сағат. Сондай-ақ ерекше білім беру қажеттіліктері бар балалардың қосымша 40 минут уақыты сақталады. Бірнеше нұсқа арқылы берілетін тапсырмалардың жауап саны қысқарған. Нақтырақ айтқанда, бір дұрыс жауабы бар тест тапсырмаларында нұсқалар саны 5-тен 4-ке дейін, бір немесе бірнеше дұрыс жауабы бар тест тапсырмаларында нұсқалар саны 8-ден 6-ға дейін азайған.
Алтай Ғали-Асқар
