Елбасы этноауылдың жұмысына оң бағасын беріп кетті
Кеше Өскемендегі этноауылдың ортасынан орын тепкен киіз үйде облыс әкімі Бердібек САПАРБАЕВТЫҢ төрағалығымен Шығыс Қазақстан облысы Қазақстан халқы Ассамблеясының ХХ сессиясы өтіп, оған аудан-қала әкімдерінің орынбасарлары, Ассамблея мүшелері, этномәдени бірлестіктердің, Достық үйлерінің, азаматтық сектордың өкілдері қатысты.
Бүгінгі таңда Шығыс Қазақстан облысы Қазақстан халқы Ассамблеясы өңірімізде тұратын барлық этностардың мәдениетін, салт-дәстүрін дамыта отырып, ұлтаралық татулық пен достықтың және келісімнің арқауына айналған қоғамдық маңызы үлкен институт екені белгілі. Мұны сессияның жұмысын ашқан аймақ басшысы, Шығыс Қазақстан облысы Қазақстан халқы Ассамблеясының төрағасы Бердібек САПАРБАЕВ кеңінен атап өтті.
– Жуықта ғана Мемлекет басшысы Нұрсұлтан НАЗАРБАЕВ облысқа келген сапарында осынау үлкен шаңырақта болып, аймақта атқарылып жатқан шаруаларға, оның ішінде этноауылдағы этномәдени бірлестіктердің жұмысына оң бағасын берген болатын. Елбасының 130-дан астам ұлт өкілдері мекен ететін Шығыстағы этноауылда облыс активімен кездесуі бекерден-бекер емес. Бүгінгі таңда бір шаңырақтың астында ғана ұйыса білген елдің бірлігі мен берекесі арта түсетінін уақыттың өзі дәлелдеп отыр. Президенттің салиқалы саясатының арқасында ұлтаралық достық бүгінде халықаралық дәрежеге жетіп, көршілес мем-лекеттердің шекаралас аймақтарында да айтулы іс-шаралар жүзеге асырылды. Соның бір ғана мысалы ретінде ағымдағы жылы Барнауыл қаласында өткен Наурыз мерекесін атауға болады. Тек қуанышта ғана емес, қайғылы сәттерде де бір-бірімізге қолдау білдіріп, көмек көрсете алдық. Су тасқы-нының зардабын тартқан Алтай өлкесінің губернаторы шығысқазақстандықтарға ризашылығын білдіріп, алғысын айтуда. 19-шы сессиядан бері бүгінге дейін облыста 1200-ден аса түрлі іс-шаралар өткізіліп, оған екі жүзге тарта адам қатысты. Аймақтағы ұлтаралық бірлікке осында отырған барлықтарыңыздың да қосқан үлестеріңіз өлшеусіз деп білемін, – деді облыс әкімі.
Сондай-ақ, облыс басшысы жиналғандарға аймақтың әлеуметтік-экономикалық дамуы, сан салада соңғы уақыттарда атқарылған шаруалар жайында баяндап, игілікті ортақ шаруада облыстың аға буын өкілдері – ардагерлеріміздің де қосып отырған үлесі үлкен екендігін атады.
Мұнан соң Шығыс Қазақстан облысы Қазақстан халқы Ассамблеясының атқарушы хатшылығының меңгерушісі Еркінбек Аязбаев баяндама жасап, біздің облыс ұлттар арасындағы достықты бекемдей түсуде елі-міз бойынша үнемі үлгілі істер атқарып келе жатқандығына тоқталды. Алғашқы Достық үйі, алғашқы этноауыл, алғашқы «Достық пен келісімнің жол картасы», «Алтай – ортақ үйіміз» жобалары, «G-global» шеңберіндегі алғашқы инновациялық конференция – нақты істердің жемісі. Оның айтуынша, қазіргі уақытта қоғамдағы өзгерістерге байланысты Ассамблея жұмысының міндеті мен бағыты жаңаша мәнге ие болуда. Алғашында Ассамблея мен Достық үйі этностардың өнерін, мәдениетін, дәстүрін дамыту жұ-мыстарымен айналысса, ендігі кезекте Ассамблея мүшелерінің алдында этномәдени бірлестіктердің жұмысын ширату, облыстың қалалары мен аудандарының тұрғындарымен байланысты нығайту арқылы Ассам-блеяның ықпалын кеңейту, қазақстандық бірлік пен азаматтық қоғамды дамытуға бағытталған нақты міндеттер қойылған.
Осынау ауқымды міндеттерді орындау мақсатында былтыр Шығыс Қазақстан облысы Қазақстан халқы Ассамблеясының 2020 жылға дейінгі даму тұжырымдамасы бекітілген. Тұжырымдамада үш жыл ішінде Зайсан, Ұлан, Аягөз, Көкпекті, Үржар және Жарма аудандарында Достық үйлерін ашу жоспарланған.
Сондай-ақ, ол жыл көлемінде жүзеге асырылған шаруаларды ретімен баяндай келіп, өңірдегі ұлтаралық жағдай тұрақты екендігін, сауалнама нәтижесі көрсеткендей, облыс тұрғындарының 74 пайыздан астамы бүгінгі таңдағы мемлекеттік саясатты қолдайтындығын жеткізді.
Бұдан бөлек сессия барысында Глубокое аудандық Достық үйінің директоры Мария Пекур, Шемонайха ауданы әкімінің орынбасары Ольга Булавкина, халықаралық «Қазақ тілі» қоғамының вице-президенті Орал Шәріпбаев, С.Аманжолов атындағы ШҚМУ-дың оқытушысы, облыстағы ғылыми-сараптамалық топ мүшесі Елена Рякова, славян этномәдени бірлестігінің төрағасы Александр Яковлев, жастар атынан семейлік Марина Шин және басқалар облыстың өңірлерінде ұлттар мен ұлыстар арасындағы татулықты ту еткен ауқымды жұмыстар жа-йында, оның маңызы мен пайдасын кейінгі жас буынға насихаттау, түсіндіру хақында сөз қозғады.
Александр Яковлев өңірдегі ұлттар арасындағы татулық пен келісімнің кеңінен қанат жаюына барынша қолдау білдіріп, бұл бағыттағы өміршең бастамалар мен идеялардың бастаушысы бола білген облыс әкімінің еңбегін жоғары бағалап, салтанатты жағдайда аймақ әкімін «Генерал Колпаковский» орденімен марапаттады және алтынмен апталған алмас семсерді естелік ретінде сыйға тартты.
Ал жастар өкілі Виктория Поросюкова сессияның жұмысына қатысушылардың атынан Қазақстан халқы Ассамблеясының кезекті сессиясында ұлтаралық бірлік пен ынтымақтықты нығайтуға қатысты Елбасы жүктеген қадау-қадау міндеттерді іске асыруға қатысты үндеу жариялады.
Сонымен бірге, жиын барысында жылдағы қалыптасқан дәстүр бойынша ұлтаралық татулық пен келісімді нығайтуға еселі еңбегімен үлес қосып жүргендер облыс әкімінің грамотасымен марапатталып, сый-сияпат иеленді.
Жиынға қатысушылар Шығыс Қазақстан облысы Қазақстан халқы Ассамблеясының мерейтойлық ХХ сессиясының аясында этномәдени бірлестіктер өкілдері әзірлеген концерттік бағдарламаны және этноауылда ашылған грузин халқының үйін тамашалады.
