Достық монументінің алдында флэш моб өтті
![Достық монументінің алдында флэш моб өтті Достық монументінің алдында флэш моб өтті](http://didar-gazeti.kz/uploads/posts/2015-02/1422851809__dsc0684-kz.jpg)
Қазақстан халқы Ассамблеясы жылының салтанатты ашылуы қарсаңында Өскемендегі Достық стелласының алдында түрлі мәдени бірлестік өкілдерінің ұйымдасуымен флэш моб өтті.
Қазақстан халқы Ассамблеясы жылының бүкіл еліміз бойынша жаппай ашылу салтанаты 6-ақпанда өтеді. Соған байланысты өтіп жатқан флэш мобқа қатысқан ұлт өкілдері өздерінің ұлттық киімдерін киіп, қолдарына көк туларын алып, бір шаңырақ астында береке-бірлікте өмір сүріп жатқандарын насихаттады.
– Елбасы Ассамблеяның XXI сессиясында 2015 жылды – Қазақстан халқы Ассамблеясының жылы деп жариялады. Қазақстанда, оның ішінде біздің облыста тұрып жатқан ұлттар бір-бірімен тату-тәтті. Бүгінгі өткізіп отырған іс-шарамыздың да мақсаты – қоғамдық тұрақтылық пен бейбітшілікті халыққа жеткізу, – деді Шығыс Қазақстан облысы Қазақстан халқы Ассамблеясы хатшылығының меңгерушісі Еркінбек Аязбаев.
Басталған акция ақпанның алтысына дейін созылады. Осы уақыт аралығында күнделікті Қазақстан Ассамблеясы жылына арналған лекциялар, конференциялар, концерттер, қайырымдылық іс-шаралары өтіп тұратын болады.
Мерей Қайнарұлы