«Бір ерекшеліктің бар екенін байқадық»
Семей қаласындағы Назарбаев Зияткерлік мектебінің шахматшы шәкірті Рамазан Сәрсенбенов кезекті мәрте жеңімпаз атанды. Ол дарынды балаларға арналған Жамбыл атындағы облыстық мамандандырылған мектеп-гимназия-интернатының 100 жылдық мерейтойына арналып ұлдар мен қыздар арасында ұйымдастырылған облыстық онлайн шахмат турнирінде қарсылас шақ келтірмеді.
Осылайша, білім ошағының 7-сынып оқушысы ата-анасының ғана емес, ұстаздары мен сыныптастарының мақтанышына айналып отыр.
– Әр ата-ананың өз баласынан үлкен үміт күтетіні сияқты біз де Рамазанның бойында бір ерекшеліктің бар екенін кішкентай кезінен байқадық. Қоршаған ортаны танып білуге деген құлшынысынан бөлек, шахматқа деген қызығушылығы бес жасында оянды. Шахмат әліппесін үйреткен өзіммін. Алты жасқа толысымен арнайы шахмат үйірмесіне жазылып, араға бір жыл салып жақсы нәтиже көрсете бастады. Алғашқы жеңісіне облыстық жарыста қол жеткізді. Ол жолы Рамазан жүлделі үшінші орынға ие болған еді, – дейді анасы Мақпал Оралбайқызы.
Алғашқы жеңісінен кейін қанаттанған жас шебер қала, облыс көлеміндегі барлық жарыстан шет қалмаған. Тіптен «Прииртышье» Қазақстан Республикасы Кубогі мен Щучинск, Павлодар қалаларында өткен республикалық сындар да бақ сынаған. Осылардың барлығында абыройы артып, жүлдегер атанған. Ол бүгінде шахматтан екінші разрядты ойыншы.
– Болашақта танымал шахматшы болуды армандайтын Рамазанның талабына әжесі Рымкеш Қабдыкәрімқызы үлкен қолдау білдіреді. Әжесі немересін қай жарысқа болмасын өзі апарып, жанкүйер болып отырады. Ұрпағының келешегіне бей-жай қарамайтын ата-ана осындай болса керек, – дейді Семей қаласындағы физика-математика бағытындағы Назарбаев Зияткерлік мектебінің баспасөз хатшысы.
Жасын Қалибек
