Айдың соңына дейін аяқталады
Риддер жылу-энергия орталығындағы негізгі жөндеу-қалпына келтіру жұмыстары осы айдың соңына дейін аяқталады. Олардың барысын аймақ басшысы Даниал Ахметов өзінің жеке бақылауында ұстап отыр.
Естеріңізге салар болсақ, 5 қараша күні сағат 20.00-де жылу орталығының күл шығару жүйесіндегі сорғы істен шығып, №1 қазандықтың қосалқы жабдығы апатты жағдайда ажыратылған болатын.
Содан бері облыс әкімі Даниал Ахметовтің жетекшілігіндегі арнайы жұмыс тобы Риддер қаласына барып, нысанды қалпына келтіру жұмыстарымен үздіксіз айналысып келеді.
– Риддер ЖЭО-да жөндеу-қалпына келтіру науқанының екінші аптасында ауқымды жұмыс атқарылды. Өңірдің түкпір-түкпірінен екі ауысымда жұмыс істейтін үздік мамандар жұмылдырылды, сондықтан проблемалық нысанда жұмыстар тәулік бойы жүргізілуде. Барлық алға қойылған, тіпті ең күрделі міндеттердің толық көлемде және ең қысқа мерзімде орындалары сөзсіз, – деп мәлімдеді Риддер әкімдігінің тұрғын үй-коммуналдық шаруашылық, жолаушы көлігі және автокөлік жолдары бөлімі.
Қазіргі мақсат бір – орташа және жоғары қысымды қазандық агрегаттарының жұмысын реттеу. Қаланы үздіксіз жылумен қамтамасыз ету үшін барлық негізгі жұмыстарды осы қарашаның соңына дейін аяқтау жоспарланып отыр.
Ержан Кеңесұлы