АЛМАТЫДАН КЕЛГЕН КУРЬЕР ҰСТАЛДЫ

Өскеменде Алматыдан келген есірткі жеткізуші курьер ұсталды.      Ол Өскемендегі Барнауыл көшесіне “Альфа-pvp” психотропты затын жасырып кетпекші болған жерінен ұсталған.

«Есірткі қылмысына қарсы іс-қимыл басқармасының қызметкерлері  ҰҰ арнайы мақсаттағы бөлімшесімен және “Сергек” АБК инспекторымен бірлесіп, Барнауыл көшесінде есірткі қойып кетпек болған курьерді ұстады. Күдікті 27 жастағы Алматы қаласының тұрғыны болып шықты», – деп хабарлайды ШҚО ПД баспасөз қызметі.

Аумақ учаскесін тексеру барысында тәртіп сақшылары лентамен оралған ораманы тапқан, оның ішінде ақ түсті ұнтақ салынған 45 кішкене орама болған. Сонымен қатар ұсталған адамның уақытша тұрып жатқан үйіне тінту жүргізіліп, полицейлер ол жерден психотропты заттарды орауға арналған заттарды тапқан.

Сараптама қорытындысына сәйкес бумалардың ішіндегі зат жалпы салмағы 23 грамнан асатын “Альфа-pvp” психотропты заты екені белгілі болды. Күдікті уақытша ұстау изоляторына қамалды.

Осы факті бойынша Қылмыстық кодекстің 297-бабы 3-бөлігімен сотқа дейінгі тергеу жүргізілуде. Күдіктіге он жылдан он бес жылға дейінгі мерзімге бас бостандығынан айыру жазасы берілуі мүмкін.

Жамал Ермен