82 үй толық жөнделді

Наурыз айында Аягөзде болған су тасқыны аудан халқының берекесі мен бірлігінің, ынтымағы мен ұйымшылдығын тағы бір дәлелдеп берді. Алапат тасқынның зардабын жою үшін жұртшылық бірден жұмылды.
Айтып келмейтін апат көптеген отбасылар үшін шын мәнісінде өз қиыншылықтарын ала келді. Жойқын су көптеген тұрғын үйлердің іргесін шайды. Әлденеше үй тұруға жарамсыз болып қалды. Облыс басшысы Даниал Ахметовтің өзі әлденеше келіп, баспанасыз қалған қала тұрғындарымен жүздесіп, олардың бастарына түскен тауқыметті өз көзімен көріп, мұң-мұқтаждарын жылдамдатып шешуге мұрындық болғанын айта кеткен ләзім.
-Сол сияқты, аудан әкімі Бақытжан Байахметов бұл жағдайды бірден өз бақылауына алды,-дейді аудандық ішкі саясат бөлімінің басшысы Медет Мырзыкешов,- Арнайы комиссия құрылып, баспанасыз қалған ағайынға тұрғын үйлер сатып әперу, бұзылған үйлерге жөндеу жұмыстарын жүргізу әкімнің тікелей бақылауында болып, бұған жауапты адамдар күн сайын аудан басшысына есептерін беріп отырды. Бүгінгі күні тасқын судан зардап шеккен 144 тұрғын үйдің жөндеуге келмейтінінің саны – 57. Баспанасыз қалған ағайынға шілде айына дейін 30 тұрғын үй, 24 пәтер сатып әперілді. Жалпы, 87 үй жөндеу жұмыстарын қажет етеді. Рас, оның 40-ы бюджет есебінен, 47-сі бюджеттен тыс жасалып жатыр. Қазір 82 үйдің жөндеу жұмыстары толығымен аяқталып отыр.
Айта кетерлігі, жан-жақтан келіп жеткен гуманитарлық көмектер де баспанасыз қалған тұрғындар үшін үлкен көмек болды. Гуманитарлық қоймаға әр облыстан, әр ауданнан құрылыс материалдары, азық-түлік күн сайын келіп жатты. Оны арнайы құрылған комиссия шашауын шығармай қабылдап, қаттап тізімін жасап отырды. Жан-жақтан келіп түскен азық-түлік тек су тасқынынан зардап шегіп, баспанасыз қалғандарға ғана емес, гуманитарлық қоймадан зағиптар, мүгедектер қоғамдарына, әлеуметтік жағынан аз қамтылған отбасыларына да бөлінді.
-Біздің соқырлар қоғамында 52 адам есепте тұрады. Олардың барлығы бірдей төрт құбыласы сай жандар деп айтуға келмейді. Аудан әкімі Бақытжан Байахметовтің зағиптарға деп арнайы бөлген ұн, май, макарон, т.б. азық-түлігі үшін алғыс айтамыз. Екі көзі суқараңғы боған жабырқау көңілді адамдар үшін бұл да бір көмек болғаны рас, – дейді аудандық зағиптар қоғамының төрайымы Құралай Елшібекова.
Бұдан өзге зардап шеккен ағайындар үшін жергілікті бюджет есебінен 142 отбасына қаржылай әлеуметтік көмектер көрсетілді. Жалпы, баспана басты орында тұратыны жасырын емес. Аягөзде су тасқынынан соң бұл өзекті мәселеге айналды. Алайда ауданда бұл тығырықтан шығу жолында үлкен жұмыстар атқарылуда. Мәселен, өткен жылы «Жұмыспен қамту жол картасы-2020» бағдарламасы арқылы Аягөз қаласындағы 50 орындық аз отбасылық жатақхана пайдалануға берілген болатын. Сондай-ақ бұрынғы Мамырсу ауылдық округі әкімшілік ғимараты қайта жөнделіп, жатақхана ретінде қолданысқа берілген еді. Мұнда да қазір жас отбасылар тұрып жатыр. Бұдан өзге қазір аудан орталығынан 60 пәтерлі 5 қабатты тұрғын үй құрылысы басталған. Құрылыс жекеменшік «СМП-610» ЖШС мен «Ертіс» әлеуметтік-кәсіпкерлік корпорациясының қаражаты есебінен салынып, пәтерлер «Тұрғынүйжинақбанкі» АҚ арқылы берілетін болады. «Нұрлы жер» бағдарламасы бойынша тағы да екі 60 пәтерлік 5 қабатты үйлердің құжаттары әзірленіп, бюджеттік сұранысқа енгізілді. Сондай-ақ 20 пәтерлі тұрғын үйдің жобалық-сметалық құжатын әзірлеуге тиісті қаражат бөлінді. Ал қарғын судан зиян шеккен ағайын үшін арнайы комиссия құрылып, баспанасыз қалғандардың мұңы мен мұқтажы ескерілді. Жөндеуге келеді-ау дейтін тұрғын үйлер жөнделіп, келмейтін үйлердің отбасылары үшін бюджет, келіп түскен қаражат есебінен баспаналар берілді. Бір сөзбен айтқанда, қазір мұнда құрылыс қарқын алған.

Берікхан Тайжігіт
Аягөз ауданы.