1500-ден астам оқушыға сөмкелер табысталды

Amanat партиясы 15 тамызда басталған «Бақытты отбасы» жобасының «Мектепке жол» акциясы аясында бүгінге дейін облыстағы аз қамтылған және көпбалалы отбасынан шыққан 1500-дей жеткіншекке оқу құралдары салынған сөмкелер табыстады.

– Бұл – біздің дәстүрлі іс-шарамыз. Балаларды әр оқу жылы қарсаңында қуантып, қолдау білдіреміз, – дейді Amanat партиясы фракциясының мүшесі, облыстық мәслихат депутаты Дмитрий Сомов.

Іс-шара мақсаты – аз қамтылған және көпбалалы отбасыларды қолдау. Он жыл бойы ұйымдастырылып келе жатқан іс-шараға депутаттар, партия мүшелері, бастауыш партия ұйымдарының өкілдері және жомарт кәсіпкерлер атсалысуда.

– Балаларды оқу жылына дайындау оңай емес. Бір баланың киім-кешегін, оқу жабдығын сатып алудың өзіне қомақты қаражат қажет. Осы ретте «Мектепке жол» акциясының біз үшін пайдасы зор. Іс-шараны ұйымдастырушыларға ризалығымды білдіремін, – дейді өскемендік көпбалалы ана Гүлжан Нүкежанова.

Ержан Әбішев