Зырянға материалдық көмек жол тартты

Облыс әкімі Даниал АХМЕТОВТЫҢ тапсырмасына сәйкес «Нұр Отан» партиясының облыстық филиалы жанынан Зырян ауданындағы тасқын салдарын жедел бақылап, мониторниг жүргізетін арнайы штаб құрылды. Аталған штаб өз жұмысын апатты елді мекендерге көмек жөнелтуден бастады.
Су көтерілген сәтте-ақ аудан бойынша тасыған судан зардап шеккен 974 адам қауіпсіз жерге көшірілген. Қазір тұрғындардың барлығы тастап шыққан үйлеріне қайтып оралды. Демек, тасқынның қайталану қаупі жоқ. Өзендегі су деңгейі 476 см көлемінде. Ал су арнасынан 530 см деңгейге көтерілгенде ғана асады. Өскемен-Рахман қайнары бағытындағы жолдың бүлінген бөлігін жөндеу жұмыстары да басталып кетті.
Тасқыннан зардап шеккен елді мекендерге арнайы комиссиялар шығып, апаттан келген шығынды есептеуде. Комиссия сондай-ақ бүлінген бөгеттер мен гидротехникалық құрылыстарды қалпына келтіруге күш салады.
Жағдайды тұрақтандырып, бақылауда ұстау үшін төтенше жағдайлар қызметі мен жергілікті атқарушы органдардан 400 қызметкер, 60 техника бөлінген.
Партия филиалы апаттан шығын көрген тұрғындарды материалдық тұрғыда қолдау үшін жергілікті партия бөлімшелері арқылы 60 тоннадан астам азық-түлік пен киім-кешек жинады. Көмек қолын созуға Күршім, Ұлан, Глубокое, Катонқарағай, Шемонаиха аудандары мен Өскемен қаласының кәсіпкерлері, тұрғындары белсенді қатысқанын айта кету керек. Мәселен, Ұлан ауданындағы «Багратион» шаруа қожалығының басшысы А.Воропай зыряндықтарға төрт тонна ұн, бір тонна күнбағыс майын бөлсе, шемонаихалық «Выдрихинское», «Камкорд», «Пытель», «Востоксельхозпродукт» ЖШС 10 тонна азық-түлік өткізген. Өскемендік кәсіпкерлер де, атап айтқанда, «Ұн тарту комбинаты» ЖШС директоры Ерлан Нұрбаев бес тонна ұн, «Кседа» ЖШС басшысы Василий Лысанский 150 мың теңгенің макарон өнімдерін, «Шығыс-жиһаз» ЖШС жетекшісі Аян Смағұлов 100 мың теңгенің азық-түлігін ұсынды.
-Қиын шақта жерлестеріне жанашырлық танытып, апаттың ауыртпалығын бірге көтерген шығысқазақстандықтардың алғашқы көмек легі бүгін жолға шықты. Мұндай көмек лектері аудандағы жағдай толық тұрақталғанша толастамайды. Бұл мәселе «Нұр Отан» партиясының тікелей бақылауында, – дейді партия филиалы төрағасының бірінші орынбасары Нұрлыбек Шерубаев.
Табиғат апатынан зардап шеккен Зырян ауданының тұрғындарына көмек жинау үшін арнайы шот ашылды. Жәрдем бергісі келген кез келген азамат төмендегі реквизиттер бойынша ақша аударуына болады.

Қазақстан Республикасы, Шығыс Қазақстан облысы, Зырян
қаласы, Курчатов к-сі, 10 үй, 306 кеңсе
«Наш город Зыряновск» жеке қайырымдылық қоры
СТН 181300214882
БИН 110740009556
ИИК KZ188560000004688552
«Банк Центр Кредит» АҚ
БИК KCJBKZKX
Тел. 7-15-18, 7-10-67
Директор Лиханова Надежда Ивановна
Бухгалтер Цыганкова Нина Викторовна

Есімжан Нақтыбайұлы