Әзілқой жастар Аягөзде бас қосты

Аягөздегі «Қозы Көрпеш – Баян Сұлу» мәдениет сарайында облыс әкімінің кубогына арналған республикалық «Жайдарман» сайысы өтіп, оған еліміздің әр түкпірінен келген әзілқой жастар қатысты.
Бұл күні «Қозы Көрпеш-Баян сұлу» мәдениет сарайының залында инешаншар орын болмады. «Аңыздар мен абыздар елі» атанған Аягөз жерінде өткен «Жайдарман» ойынының негізгі мақсаты – ғашықтықтың символына айналған Қозы Көрпеш пен Баян Сұлуға құрмет көрсету, қазақстандық «Ғашықтар күнін» жастар арасында кеңінен насихаттау болды. Әзіл-оспақты сағынған Аягөз жастарына «Арал-Ас», «Шу –Чу», «Жаснар», «Ұлттық құрама», «Тұран – Алматы», «Альянс Семей», «Өскемен» мен жергілікті «Аягөз құрамалары» көтеріңкі көңіл күй сыйлап, күлкіге қарық қылды. Әр команда өзіндік ойын ерекшеліктерімен көрініп, әрбір әзілдерінде қоғамдағы белең алып жүрген мәселелер мен қол жеткізген жетістіктерімізді әзілмен жеткізіп, аягөздік көрермендердің көңілінен шыға білді.
Жарты оқпен жалпыны жалпасынан түсірер уытты қалжыңның тиегі ағытылған сайысқа облыстық ішкі саясат басқармасы басшысының орынбасары Жасұлан Сәрсебаев, «Қазақстан–Өскемен» телеарнасы директорының орынбасары Аида Жабағиева, аудандық ішкі саясат бөлімінің басшысы Роза Қайырбаева, облыстық жастар орталығының директоры Арайлым Есімбекова мен Аягөз аудандық жастар орталығының директоры Саят Ибраев қазылық жасады.
Сонымен, Аягөзде өткен республикалық «Жайдарман» фестивалінің қорытындысы бойынша облыс әкімінің кубогы алматылық 2014 жылғы жоғары лига чемпиондары «ҚазҰУ» жігіттерінің қанжығасына байланса, Семейдің «Альянс» командасы екінші орынға шықты. Ал оңтүстіктен келген «Шу –Чу» құрамасы үшінші орынды місе тұтты.
-Мұндай дүбірлі дода Шығыста жыл сайын өтіп тұрса, нұр үстіне нұр болар еді. Ақындар елі, абыздар елі атанған Аягөз қаласына ат басын бұруымызда да үлкен мән бар. Мұнда да тамыры тереңнен нәр алып жатқан туған тіліміздің мәйегі сақталған деуге болады. Сондықтан өңірде болашағынан үміт күттіретін жастар жетерлік. Бүгін жастар жоғары ойын өрнегін көрсете білді. Дегенмен, тек лайықтылар ғана жүлделі орындардан көрінді,- дейді Қазақстан КВН одағының президенті Есен Елеукен.

Берікхан Тайжігіт
Аягөз ауданы.