Жүз жиырма велошабандоз бес жүзден астам шақырымда бақ сынайды

Өскеменде Қазақстан велоспортының 100 жылдық мерейтойына орай «Қазақстан оқушысы-2014» атты 45-ші халықаралық веложарысының ашылу салтанаты өтті. Оған Өзбекстан мен еліміздің әр аймағынан келген 18 құрама командадан тұратын 120 велошабандоз қатысып жатыр.
Аталмыш жарысты Қазақстанның велоспорт федерациясы Білім және Ғылым министрлігінің Ұлттық ғылыми-тәжірибелік дене тәрбиесі орталығы, облыс әкімдігі мен облыстық білім басқармасы ұйымдастырып отыр. Қырық бес жылдық тарихы бар веложарысты өткізудегі мақсат – республиканың велоспорт құрамасына спортшыларды іріктеу, аталмыш спорт түрін дәріптеу, сондай-ақ, халықаралық спорттық байланысты нығайту болып табылады. Республика алаңында өткен веложарыстың салтанатты ашылуына облыс әкімінің бірінші орынбасары Ермек Көшербаев, Білім және ғылым министрлігіне қарасты Ұлттық ғылыми-тәжірибелік дене тәрбиесі орталығының өкілі Сергей Гаркушенко, веложарыс директоры Александр Антышев, веложарыс спортының ардагері Иван Плешкань және жарыстың бас демеушісі «Астана Моторс» компаниясының өкілі Станислав Черных және тағы басқалар қатысты.
Алғаш болып сөз алған облыс әкімінің бірінші орынбасары Ермек Көшербаев барша қатысушыларды құттықтап, бұл сайыстың «шағын велосипед академиясы» деп аталуында үлкен мән бар екенін, Олимпиада чемпионы атанған Александр Винокуровтың, Андрей Кивилев, Марат Сатыбалдиев, Николай Макаров, Игорь Потенко сынды айтулы спорт шеберлерінің осы жарыстан шыңдалып шыққанын атап өтті. Ал веложарыс директоры Александр Антышев барлық велошабандоздарға сәттілік тіледі:
– Испанияда өтетін Әлем чемпионатына Шығыс Қазақстан алғаш рет жолдама беріп отырған жоқ. Табиғаты көз тартар осынау өңірде бұл жарыс 15-ші рет өткелі тұр. Сол себепті барша жиналған қауымды, сайысқа қатысушыларды, жанкүйерлерді құттықтаймын, – дей келе, еліміздің федерациясының президенті Қайрат Келімбетовтің Қазақстан велоспортының 100 жылдығына арнайы жолдаған құттықтауын жеткізді.
Жарыс жылдағыдай Өскемен қаласының маңындағы тасжолда өтеді. 2-10 тамыз аралығын қамтытынсайыс кезінде 80 және 100 шақырымға бес топтық, 20 шақырымға жеке және 50 шақырымға критериум жарысы өтеді деп жоспарлануда. – Мен бұл спорт түрімен бала кезімнен айналысып келемін. Жасым – 16-да. Үлкен додаларға енді-енді қатысып жатырмын. Жеңіс тұғырынан көрінуге бар күш-жігерімді саламын. Арманым – спорттың веложарыс түрінен олимипиада чемпионы атану, – дейді Алматы қаласынан келген жарысқа қатысушы Әділет Жақсылықов. Өзбекстанның Ташкент қаласынан келген 10-сынып оқушысы Закир Ихсановтың алға қойған мақсаты – Шығыс Қазақстанның жолдарымен жақсы деңгейде жүріп өтіп, Әлем чемпионатының іріктеуіне өту. Ал өскемендік Илья Рябов үшін бұл жолдар таңсық емес. Себебі, бірнеше мәрте жүріп өткен.
– Сондықтан жақсы нәтиже көрсетуге тырысамыз, – дейді ол.
Алдағы бір апта көлемінде велошабандоздар 550 шақырым қашықтықта жүйткіп, бақтарын сынамақ. 10 тамыз күні Республика алаңында сайыстың жабылу салтанаты өтеді деп жоспарлануда.

Назерке Ахметова