Жөндеу жұмыстары уақытында аяқталады

Қазір барлық білім беру мекемелерінде жаңа оқу жылына дайындық жұмыстары қызу әрі қарбалас жүріп жатыр. Осы орайда, аудандық білім бөлімінің басшысы Сәуле Жүнісоваға жолығып, мектептердің алдағы оқу жылына дайындығын сұрастырып білген болатынбыз.

Сәуле Орынбайқызының айтуы бойынша, 2017-2018 оқу жылдарындағы жылыту маусымына 51 мектеп пен мектеп жанындағы интернат, бірнеше балабақша, балалар шығармашылық үйі, саз және спорт мектебі, сонымен қатар, 30-дан аса білім ошағының жылу қазандығы, бір мектептің электр қазандығы, 13 мектептің теплофоны, алты білім ғимаратының пеш жүйесі жөндеу жұмыстарына қамтылды. Осы жылы аудандағы 18 мектептің ағымдағы жөндеу жұмыстарына 122450,0 мың теңге қаражат бөлінген.

Қарастырылған қаражат мүмкіндігінше толық игерілуі тиіс. Нақтылап айта кететін болсақ, «Өңірлерді дамыту» бағдарламасы аясында құны 12370,0 мың теңге болатын екі мектептің ағымдағыы жөндеу жұмыстары басталып кетті. Мақаншы ауылдық округіндегі С.Сейфулин орта мектебінің айналасындағы гүлзар қоршауын қалпына келтіру жұмыстарына 7695,0 мың теңге бөлініп, «Еңбек – Өскемен» РМК филиалымен келісім-шарт жасалды. Сондай-ақ, қосалқы мердігер «Үржар Кең Дала» жауапкершілігі шектеулі серіктестігі бүгінгі күндері 719 метр қоршау даярлады. Осы округтегі Ә.Найманбай атындағы білім ошағының жылу жүйесінің ағымдағы жөндеу жұмыстарына 4675,0 мың теңге бөлініп, бұлар да «Еңбек- Өскемен» РМК филиалымен келісімшартқа отырды.

Сонымен қатар, облыстық бюджет есебінен бұл жылы үш мектептің жөндеу жұмыстарына 92381,0 мың теңге қарастырылған. Атап көрсетсек, Игенбайұлы орта мектебінің спорт залының ағымдағы жөндеу жұмыстарына 24850,0 мың теңге бөлінсе, Қаратал орта мектеп-бақшасының шатырын күрделі жөндеу жұмыстарына 49733,0 мың теңге жұмсалмақ. Сол сияқты, Алтынсарин орта мектебінің шатырын ағымдағы жөндеу жұмыстарына 17798,0 мың теңге бөлініп, осы білім мекемелерінің барлығы «Еңбек Өскемен» РМК филиалымен келісім шартқа отырды. Жергілікті бюджеттің есебінен биыл он білім беру ошағының ағымдағы жөндеу жұмыстарына 42549,0 мың теңге қарастырылған. Бұл қаражат Қарақол, Некрасовка, Тасарық негізгі мектебі, Тұрағыл Қоңыр атындағы орта мектебі, Көктерек, Тұрлығанов атындағы, Алтынсарин атындағы, Қаратал, Игенбайұлы атындағы мектептерге жұмсалмақ. Жасалған келісімшарттар негізінде ағымдағы жөндеу жұмыстарын 10 тамызға дейін аяқтау жоспарланған.

Бейсенғазы Ұлықбек
Үржар ауданы.