Жұмыс табуға жәрдемдеседі
Биыл Өскеменде 861 адам жұмыспен қамту орталығының қызметіне жүгінген. Олардың арасында кәсіпкерлік курстарын оқып, несие алып, кәсіпкерлікпен айналысуды көздеп отырғандары да бар.
– Өткен жылы «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған бағдарламасы» бекітілді, – дейді «Өскемен қаласының жұмыспен қамту және әлеуметтік бағдарламалар» мемлекеттік мекемесінің басшысы Мәулихат Құсайынова. – Ол үш бағытта жүргізіліп жатыр. Біріншіден, қажетті мамандықтар мәселесін қысқа мерзімді оқыту арқылы шешудеміз. Оған 9-11 сынып түлектері мен оқу орнына түспегендер, жұмыс іздеушілер мен әлеуметтік аз қамтылған отбасы мүшелері, сондай-ақ, өзге де санаттағы азаматтар қатысады. Оқу мерзімі бір айдан алты айға дейін. Білім алушыға шәкіртақы, жол жүруіне өтемақы және ыстық тамақ беріледі. Екіншіден, жұмыссыздар мен өзін-өзі жұмыспен қамтушыларға кәсіпкерлік негізін оқытудамыз. Өзінің бизнес-жобасын жүзеге асырғысы келетіндерге шағын несие де берілуде. Жоғарыда айтылған 861 жастың үшеуі осы бағытта несие алып, өз ісін бастауға бекіп отыр. Ал үшіншісі, оқушылар мен студенттерді ақпараттандырып, жұмыссыздарға кәсіби бағдар беруге бағытталады. Сондай-ақ, олардың кәсіби бейімін анықтау үшін әртүрлі қызметтерге жолдап көреміз. Жыл басынан бері хабарласқан жастардың 390-ы тұрақты жұмысқа орналасып, 28-і әлеуметтік жұмысқа, 100-і қоғамдық жұмысқа жөнелтілді.
Бағдарламаның жастар іс-тәжірибесі бағыты да жеміс беріп жатыр екен. Тәжірибеден өтуге барғандардың жұмысқа қабылданғаны көп. Бұған диплом алғанына үш жылдан аспаған жастар қатыса алады. Төленетін еңбекақы 25 айлық есептік көрсеткіш, яғни, 56725 теңге. Әзірге 128 адам іс-тәжірибеден өтуге жөнелтілген.
Биыл қаладағы үш жоғарғы оқу орны мен 19 колледжді 4332 студент бітірді. «Өскемен қаласының жұмыспен қамту және әлеуметтік бағдарламалар» мемлекеттік мекемесінің анықтауынша, бітірушілердің 1697-сі қызметке орналастыруды қажет етеді. Жоғарыдағы бағдарлама аясында орталық олардың жұмыс табуына жәрдемдеспек.
Тасқын Болатұлы
Өскемен.
