Жұмыс орындарын сақтап қалуға кепілдік берді

Аймақ басшысы Даниал АХМЕТОВТІҢ тапсырмасымен әкімдік пен кәсіпорындар арасында жұмысшылардың еңбек құқықтары және өндіріс үдерістерін тұрақты сақтау мәселелері бойынша өзара ынтымақтастық жөніндегі меморандумға қол қойылды. Үшжақты облыстық комиссияның кезекті отырысына және меморандумға қол қою рәсіміне облыс әкімінің орынбасары Нұрымбет Сақтағанов қатысты.
Әлеуметтік және еңбек қарым-қатынастарын реттеу меморандумына өңірдің бірқатар кәсіпорындары қол қойды. Олардың қатарында «Арматура зауыты» АҚ, «Восток Молоко» ЖШС, «Қазақ цемент» ЖШС, «Тарбағатай мұнай» ЖШС, «Жарма-құрылыс газ» ЖШС бар.
– Осы меморандумда облыс әкімдігі мен Үкімет тарапынан кәсіпорынның жаңғырту бағдарламасын жүзеге асыруға қолдау көрсетілетіндігі айтылды, біз өз кезегімізде жұмыс орындарын сақтап қалуға, сондай-ақ, өңірдің, еліміздің дамуына қажетті сапалы әрі тиімді өнім шығаруға тырысамыз, – дейді «Арматура зауыты» АҚ бас директоры Андрей Кандинский.
«Жарма құрылыс газ» ЖШС-де 100-ден астам жұмыс істейді. Қалбатау ауылында орналасқан кәсіпорын сұйық газ шығарумен, құрылысқа қажетті материалдар өндірумен айналысады. «Қазір әлем экономикасы дағдарысты бастан кешіріп жатқандығы жасырын емес. Осындай қиын кезеңде біз облыс басшылығымен ұжымымызды сақтап қалатындығымды растайтын құжатқа қол қойдық және қиындықтарды бірлесіп жеңетіндігімізге сеніміміз мол», – деді кәсіпорын басшысы Виктор Исабаев.
Бүгінгі күні облыста осындай 3494 меморандумға қол қойылды. Бұл меморандумға сәйкес, кәсіпорындарда жұмыс орындарын сақтап қалуға, өнімді еңбек етуге кепілдік берілді.

Лаура Тілеубайқызы