Шығыс Қазақстан лингвистикалық орталығының жұмысы жылдан-жылға қарқынды дамып, республикалық деңгейде өзінің лайықты орнын алып отыр. Орталықтың жеткен жетістіктері, биік белестері де аз емес. Мекеме ұжымының тіл саясатын жүзеге асыруда сіңірген еңбегі мол. Орталықта жоғары білімді, ересектермен тіл табыса алатын, жан-жақты, білікті оқытушылар қызмет етуде.

Лингвистикалық орталықтың басты мақсаты – ересектерді тілді меңгеруге тарту, межеленген нәтижеге қол жеткізу. Мақсатты көрсеткіш, яғни жұмыстың нәтижесі ҚАЗТЕСТ жүйесімен айқындалатын болғандықтан, лингвистикалық орталық Астана қаласындағы Ұлттық тестілеу орталығымен тығыз байланыста жұмыс істейді. Орталық оқытушылары облыстағы мемлекеттік және бюджеттік сала қызметшілерін ҚАЗТЕСТ жүйесі негізінде диагностикалық және сертификаттық тестілеуге дайындайды. Сәуір айында өткен байқау сынағына облыс бойынша 4000-ға жуық қызметкер қатысып, білімін сынады. Аталмыш шара Шығыс Қазақстанда 2011 жылдан бері үздіксіз өткізіліп келеді.

Лингвистикалық орталықта мемлекеттік қызметшілермен қатар қала тұрғындары да арнайы бағдарлама бойынша «Тілашар» курсында оқып шығады. Курс соңында тіл үйренушілер алған білімдерін ашық сабақта көрсетіп, үйренген сөздік қорын түрлі жағдайларда пайдаланып, коммуникативтік қарым-қатынасқа түсе алатындарын дәлелдейді. Жуықта ғана қала тұрғындарына арналған курс аяқталып, сабақ «Жар-жар» ток-шоу бағдарламасы түрінде өткізілді.
Орталық жұмысының нәтижелі болуына әдістемелік жұмыстың да маңызы зор. Оқытушылардың біліктілігін арттыру мақсатында облысымыздағы жоғары оқу орындарының ғалымдары шақырылып, түрлі форматтағы әдістемелік семинар, вебинар, отырыс, шеберлік сабақтары өтіп тұрады. Сондай-ақ оқытушылардың бәсекеге қабілеттіліктерін дамыту мақсатында ішінара байқаулар да өткізіледі.

Орталық оқытушылары Ш.Шаяхметов атындағы республикалық әдістемелік-үйлестіру орталығының ұйымдастыруымен өткізілген республикалық семинарда өздерінің іс-тәжірибелерімен бөлісіп, Қазақстанның түкпір-түкпірінен жиналған орталық оқытушыларына әртүрлі тақырыпта жаңа сабақ үлгілерін көрсетіп, оң бағасын алды.

Жыл сайын Ш.Шаяхметов атындағы республикалық әдістемелік-үйлестіру орталығы ересектерді оқытуда пайдаланатын, заман талаптарына сай оқу-әдістемелік құралдар дайындауға байланысты байқау өткізеді. Осы байқауға орталықтан А.Мурсалимова, А.Аменова қатысып, жинақтары республикалық орталықтарға көмекші әдістемелік құрал ретінде таратылды.

Елбасының «Болашаққа бағдар: рухани жаңғыру» бағдарламасын жүзеге асыру барысында орталық «Әдемі сөйле» атты жобаны ойлап тапты. 2017 жылы 4-6 желтоқсан аралығында облыс бойынша тілдерді оқыту орталықтарының оқытушыларына арналған коучинг, 12-13 желтоқсанда студент жастардың арасында тренинг өткізілді. Бүгінгі күні облысымыздың тіл оқыту орталықтарында жоба бойынша курстар жүргізіліп жатыр. Жобаның мақсаты – тіл үйренушілерді шешендік өнерге баулу, халық алдында сөйлеу мәдениетіне үйрету.

Рухани жаңғыру бағдарламасы аясында қазақ әліпбиін латын қарпіне көшіруге байланысты жұмыстарда да орталық ұжымы белсенділік танытып отыр. Жаңа алфавитті түсіндіру, ақпарат беру мақсатында әртүрлі аудиторияларда семинар-тренингтер, семинар-кеңестер, конференциялар, акциялар, көрмелер, танымдық сабақтар, кездесулер, пікірталастар, дөңгелек үстел отырыстары және т.б шаралар өткізіп жатыр.

Қорыта келе, «Жұмыла көтерген жүк жеңіл» демекші, бірлесіп атқарған іс-шаралар мемлекеттік тіліміздің абыройын асқақтатып, туын биікке көтереді деген сенімдеміз.

Арай Мурсалимова,
Шығыс Қазақстан лингвистикалық орталығының әдіскер-оқытушысы

Мақала облыстық тілдерді дамыту басқармасының тапсырысы бойынша әзірленді