Жаһандық додада жасындай жарқылдады
Шығысқазақстандық гір көтерушілер тағы бір мәрте мықтылығын дәлелдеді. Үндістанның Дели қаласында гір спортынан өткен Әлем чемпионатында жерлестеріміз ел қоржынын жүлдеге толтырып, жанкүйерлерінің төбесін көкке жеткізді.
Әсіресе, тарбағатайлық және зайсандық спортшылар ерледі. Жаһандық додада бұл екі ауданның бір емес, бірнеше спортшысы ел намысын қорғаған болатын және олардың дені үздіктер қатарынан көріне білді. Мәселен, ерлер арасындағы бәсекеде бақ сынаған Тарбағатай ауданының тумасы Айбол Слямбеков күміс жүлдеге ие болып, жетіаралдық ауылдастарын бір қуантып тастады. Осы ретте, Айбол бұған дейін Қазақстан біріншіліктерінде алты мәрте топ жарғанын айтқан жөн. Ол сондай-ақ 2018 жылғы дүниежүзілік Универсиадада жеңіске жеткен еді. Азия біріншіліктеріндегі жетістігі де ауыз толтырып айтарлықтай, ол – Сары құрлықтың төрт дүркін чемпионы.
Сол сияқты, биылғы Әлем біріншілігінде тағы бір тарбағатайлық спортшының асығы алшы түсті. Үнді жеріндегі дүбірлі додада Ақжар ауылының тұрғыны Еркеназ Аханова мінсіз өнер көрсетіп, екі дүркін Әлем чемпионы атанды. Бұдан бөлек, Еркеназдың еншісінде Қазақстан мен Азияның чемпиондық атақтары да бар.
Тарбағатайлықтардан Зайсан ауданының мықтылары да қалысқан жоқ. Жаһан біріншілігіне бұл ауданның екі бірдей саңлағы Ернұр Қайрат пен Қуаныш Қыдырпатша қатысқан болатын. Нәтижесінде екеуі де жеңіс тұғырына көтерілді. Атап айтсақ, 68 келіге дейінгі салмақ дәрежесінде бақ сынаған Ернұр Қайрат салмағы 24 келі болатын гір тасын 189 рет көтеріп, үш дүркін Әлем чемпионы атанса, 95 келіден жоғары салмақта өнер көрсететін Қуаныш Қыдырпатша серпе көтеруде де, жұлқа көтеруде күміс жүлдеге ие болып, Әлем чемпионаттарындағы жүлделерінің санын бесеуге дейін жеткізді.
Сәрсен Қабылым
