ЖАҢАЖЫЛДЫҚ СЮРПРИЗ

Тәйірі, шайтан түртейін десе, түк емес екен. Осы жасқа келгенше «Жаңа жылды полиция бөлімінде қарсы аламын» деп кім ойлаған. Бәрінен бұрын ай сайын банкке төлейтін 60 мың теңге несиені айтпағанда, тапқан-таянғаны күнделікті ішіп-жемнен аспай, тыраштанып кеп жүрген сорлыға «штраф» дегені пәле болды. Бақандай 100 мың теңге…
Әй, өзіне де обал жоқ. Жайымен өсіп тұрған шыршада не әкесінің құны бар десеңші? Әншейінде іздесең табылмайтын балтаның да жүк салғыштан табыла кеткенін айтпайсың ба?.. Мана түске қарай төрт адамды салып алып, Риддерге тартып тұрған. Ойы – күнделікті жанармайға болса да, нәпақа таба қою. Қас қарая екі жолаушы табылып, облыс орталығын бетке алған. Адам баласының мінезі қызық осы. Кейде бір тәтті қиялдың жетегіне еріп алса, қарадай желпініп кететіні бар. Жолдың екі қапталы сыңсыған қарағай. Бір белден аса бере, жол жиегіне тоқтай қалған екі жігіт абың-күбің шырша шауып жатыр екен. Шамасы, дәл Жаңа жылдың қарсаңында жас шыршаның иісін бұрқыратып апарып безендіре қоймақ-ау. Несі бар, тамаша идея. Иен-тегін дүние, аңдып тұрған ешкім жоқ. Қаладан сатып алса, бір бұтағының өзі қып-қызыл ақша.
Жылда осы уақытта шамдары мен қызылды-жасылды ойыншықтарын іліп, көздің жауын алардай етіп безендіріп қоятын гараждағы жасанды шыршаны биыл құрмаған. Сонысы дұрыс болмаған секілді. Сонау кеңес заманынан қанға сіңіп, әбден көз үйреніп қалғандікі ме, үйдің іші біртүрлі көңілсіздеу. Жұрттың бәрі жапа-тармағай әбігерленіп жатқанда, өзін қуаныш атаулыдан сырт қалғандай сезініп, көңілі қоңылтақсып жүрген. Міне, дәл осы олқылықтың орнын толтыра қоюдың мұнан артық қандай орайы бар?!. Осылай деп ойлауы мұң екен, жол жиегіне қалай тоқтағанын өзі де байқамай қалды. Талайдан бері қолына алмаған балтасының жүзі де қылпып тұр екен. Айналасы 15 минутта жүк салғышқа сиятындай бір шыршаны бұл да жайратып салған. Жаңа жылға дейін әлі үш-төрт сағат уақыт бар. Апарып безендіре қойса, үйдегілерге нағыз сюрприз болмай ма? Мұның шауып алған бір тұтам шыршасынан табиғат жүдей қалмас. Иттің итақайы кесіп алып жатқан жоқ па? Әсіре жедел әрекетіне риза көңілмен бір мырс етіп, «Әй, өзім-ай, ә!» – деп өзіне де бір көпшік қойып қойды.
Бірақ, Сағатбектің бұл қуанышы көпке созылмады. Қаланың кіреберісіндегі жол сақшылары тоқтатып, әуелі құжаттарын, сосын жүксалғышын тексермей ме?.. Міне, бар пәле осы жерден басталған. Алғашында «Жол сақшысының қолына бір-екі мың теңге қыстыра салсам ба?» деп ойлап, кейін ол ойынан айнып қалған. Сонысы бекер-ақ болған екен. Қазір сол сәт қайталана қалса, екі мың емес, тіпті 20 мың беруге де бақұл. Амал қанша, енді өкін, өкінбе, бәрі де кеш… Ертең сот шешімі шыққасын, қайдан тапсаң, онан тап, табиғатқа зиян келтіргенің үшін 100 мың теңгені төлейсің…
Осыны ойлаған Сағатбектің салы суға кетіп, ұнжырғасы түсе берді. Бұл кезде қабырғадағы сағат тілі Жаңа жылдың алғашқы минуттарын есептеп жатқан…

Серік Құсанбаев