Қоғам

Зайсандықтар көкөністі көп әкеліпті

Зайсандықтар көкөністі көп әкеліпті

Азық-түлік бағасын тұрақтандыру мақсатында облыс орталығында өтіп келе жатқан кезекті сенбілік жәрмеңкеге Зайсан ауданының шаруалары өз тауарларын әкелді. Жәрмеңкені облыс Әкімінің орынбасары Нұрлыбек Шерубаев аралап, көрді.

Аудан шаруалары сенбілік жәрмеңкеге жиыны алты тонна сиыр, жылқы, қой етін, екі тонна картоп, бір тонна сәбіз, қырыққабат әкелді. Сиыр мен қой етінің келісі – 900 теңге, жылқы – 1000, қазы – 1500 теңгеден сатылды. Қытаймен шекаралас аймақ болғандықтан, екі-үш тонна көкөніс пен жемістің де алуан түрі жеткізіліпті. Қала тұрғындары мандарин мен алма, бананның келісін – 220, апельсинді – 280, қияр мен қызанақты – 380 теңгеден сатып алды.
Зайсан көлінің балықтары да жұрт назарынан тыс қалмады. Әсіресе, «Рыбаки Зайсана» ЖШС балықтың түр-түрін қол жетімді бағамен сатты.
Қазақша таза сөйлейтін зейнеткер Валентина Сергеева Дайыр ауылдық округіндегі «Михаил» шаруа қожалығының жетекшісі екен. Иелігінде 125 гектар жері, қорасында 50 – 60 ірі қарасы бар Валентина Михаиловна ірі қара еті мен күнбағыс майын саудаға шығарды.
«Азамат» шаруа қожалығының иесі Асқар Шәкенұлының көкөніс өсірумен айналықанына 10 жыл болыпты. Оның өніміне қызығушылар да көп болды.
– 100 гектар егіндік жерім бар. Өткен жылы 15 гектарға картоп, бес гектарға қауын-қарбыз еккенбіз. Былтыр жаңбырлы болғандықтан, мол өнім алдық. Биыл «Жұмыспен қамту-2020» бағдарламасы арқылы үш миллион теңгеге тапсырыс беріп қойдық. Өнімді өткізуде еш қиыншылық жоқ. Осындай жәрмеңкелердің де пайдасы көп тиеді, – дейді ол.
Қала тұрғыны, зейнеткер Әділбек Бейсенбекұлы жәрмеңкеге тұрақты келушілердің қатарынан көрінеді. Ол зайсандық шаруаларға риза екенін білдірді.

Эльмира Тайырқызы

Осы айдарда

Back to top button