Зауыт құрылысы мамыр айында аяқталады

Кеше облыс әкімі Даниал АХМЕТОВ «Азия Авто Өскемен» кәсіпорнының құрылыс алаңында болып, қалашық жобасымен танысты.
Аумағы 25 мың шаршы метрді алатын кешен кішігірім қалашық іспеттес. Компания басшылығы кәсіпорынның негізгі нобайын өздері құрастырған. Мамандар тек сол нобайды ғылыми негізге келтіріпті. «Бипек Авто»-«Азия Авто» компаниялар тобы директорлар кеңесінің төрағасы Анатолий Балушкин аймақ басшысына құрылысқа барынша меншікті материалды пайдаланып жатқандарын баяндады. Мұндағы ғимараттың барлығы металл құрандылардан тұрғызылғанымен, астына бетон төселетіндіктен, арнайы цех салуға тура келген. Сол үшін Түркиядан бетон шайқайтын миксер, Қытайдан тасүккіш станок алдырған. Осы екі құрылғының арқасында зауыт сағатына 60 текше метр бетон өңдеуге қауқарлы. Алдағы уақытта бұл цехты жетілдіріп, темір-бетон бұйымдардың барлығын өздерінде өндіру де жоспарланып отырса керек.
– Технология талабы бойынша еденнің барлығы бетон болуы тиіс. Сол себепті де бізге өз бетон зауытымыз болғаны маңызды, – дейді «Азия Авто Қазақстан» АҚ бас директоры Ержан Мәндиев.
Облыс басшысы Даниал АХМЕТОВ құрылысқа қолданылған материалдардың қазақстандық құрамына баса назар аударды. Өзімізде метал құрандылардың көп түрі өндірілетініне қарамастан, кейбір ғимараттардың қабырғалары ресейлік материалдан тұрғызылғанына қынжылыс білдірген облыс әкімі зауыт басшыларын бұл мәселеге де мән беруге шақырды.
Негізгі өндіріс кешендерінен бөлек сегіз қойма, үш жатақхана және қосымша шаруашылық ғимараттар – асхана, кір жуатын орын, өрт сөндіру бекеті және шағын емхана бой көтерген. Анатолий Балушкин инвестор табылған жағдайда қоймалар мен гараждардың санын көбейтіп, өндірісті жылдамдату үшін цехтардың арасында бөлшектерді тасымалдайтын конвейер паркін де қалыптастыруды жоспарлап жүргенін жеткізді. Ал тұтынушыларға арналған үш қабатты ғимарат шыныдан тұрғызылмақ. Мұнда адамдарға таңдаған көлікті теуіп көруіне жағдай жасалады.
Құрылысты мамыр айына дейін аяқтау көзделіп отыр. Қоймалар мен шаруашылық ғимараттарынан бөлек бояу және дәнекерлеу цехтарының құрылысы біткен. Қазірдің өзінде құрылысқа қажет бетондар шайқалып, қарқынды құрылысқа қызу дайындық жүруде. Күн жылына салысымен құрылысқа 354 техника жұмылдырылмақ.
Өңір басшысы жобаның сауатты ойластырылғанын атап, құрылыс барысына оң баға берді.
– Жалпы, барлығы өте сәтті ойластырылғаны көрініп тұр. Өндіріс барысын ғана ойлап қоймай, жұмысшылардың әлеуметтік жағдайына көңіл бөлгендеріңіз ұнады. Ендігі жерде құрылыстағы қазақстандық құрамды мейлінше арттыруға мән беріңіздер, – деді облыс әкімі Даниал АХМЕТОВ.

Есімжан Нақтыбайұлы