Әйгілі «Ақбілек» романына арқау болған ауыл құрып барады

Егіндібұлақ ауылының өзіндік тарихы бар. Онда өмір сүрген, еңбек еткен қарапайым әр адам өмірінің өзі бір-бір кітапқа арқау боларлықтай.

Егіндібұлақ тарихы демекші, жазушы Жүсіпбек Аймауытовтың «Ақбілек» романының оқиғасы осы елде болған. Осы кітаптағы оқиғаларға байланысты аталатын жер аттары Бөкенбай тауының теріскей беті, Терісайрық бойындағы Маубас пен Қарасеңгір бауырындағы қазіргі Қаратоғай ауылы тұрған аралықты меңзейді. Қаламгердің шығармасына арқау болған осындай табиғаты әсем, ауасы таза Егіндібұлақ ауылында 2009 жылы мектеп жабылып, адамдар көшіп кетіп жатыр.
Дариға (Ақбілек) болыс болып, Қаратоғайда және Егіндібұлақта мектеп салдырады. Терісайрық өзенінің жағасындағы ұзын қырқа «Ақбілек» атанып кетеді. Қазір де солай аталады. Өлкетанушы, қарт ұстаз Ақаш Жүнісов «Ақбілек» романындағы оқиға желісін саралай отырып, осы біздің Егіндібұлақ ауылының тарихын, сол кездегі болған қиыншылықтарды, халық басына түскен ауыртпалық, нәубет өткен дәуір құбылыстарын өзінің «Шежірелі тау қойнауы» атты еңбегінде тамаша көрсетіп, атақоныс тарихын келер ұрпаққа ұғындырып жазған.
Қазіргі кезде ауылдағы 15 үйде 52 адам ғана тұрады. Тұрғындар мал өсіріп, бау-бақша салып тіршілік жасауда. Қыстың қамын жаз ойлап, қолда бар техникамен шөптерін шауып қаракет етеді. Әйелдер сиырын сауып, құрт-майын алып дегендей күнделікті күйбің тіршілікпен айналысады.
Дегенмен, көшіп кеткендер ата-бабасының басына зиярат етіп тұрады. 2012 жылы осы ауылдан өрбіген мыңдаған адам қатысқан үлкен ас болды. Тіршілік қамымен туған елінен кеткендер түгел жиналып, ата-баба рухына тәу етті. Мұнда туған жерге деген қимастық сезім, сонау бал-балалық күндерге деген сағыныш, біртіндеп жер бетінен жоғалып бара жатқан ауылға деген махаббат, туған өлкеге деген сүйіспеншілік, бәрі-бәрі бар еді.
Өкініштісі, қазір мұнда бірде-бір мемлекеттік мекеме жоқ. Халық жұмыссыз, балалар мектепсіз. Шамасы жеткеннің бәрі көшіп кеткен. Қазіргі урбандалу кезеңі деп осыны айтамыз ба? Халық үлкен қалаларға шоғырланып, жақсы да жайлы өмір іздеп, дұрыс өмір сүру жолдарын қарастырып, атамекенін қимаса да ұрпақ қамын ойлап сонда кеткен. ХХІ ғасырдағы заман ағымы осылай десек те, бір кезде тіршілік қазаны қайнап жатқан қайран ауылды қимайсың.

Перизат Тоқтауова

Қалғұты ауылы, Күршім ауданы.