Үш мыңға жуық пәтер қолданысқа беріледі

Жыл соңына дейін өңірімізде 3 мыңға жуық пәтер пайдалануға беріледі. Бұл туралы облыс әкімдігінің отырысында аймақ басшысы Даниал Ахметов мәлім етті. Жиында тұрғын үй құрылысынан бөлек тіл саясаты және білім саласын цифрландыру мәселелері де талқыланды.

– Жыл соңына дейін біз 317 мың шаршы метр тұрғын үйді пайдалануға береміз, бұл – 3 мыңға жуық пәтер. Келер жылы бұл көрсеткішті 8 мыңға дейін арттыру жоспарлануда, – деді аймақ басшысы.

Жеке инвестициялар есебінен салынып жатқан коммерциялық тұрғын үйге сұраныс бар. 64 үйге жобалық-сметалық құжаттама әзірленіп, Өскеменнің 22-ші шағын ауданында құрылыс үшін учаскелер рәсімделуде. «Бірқабатты Шығыс» бағдарламасы бойынша 126 үй салынып жатыр. Ауылдарда көпбалалы отбасылар үшін тағы 58 үйдің құрылысы жүруде.

– Тіл саясаты мәселесі өте өзекті. Ауызекі қазақ тілін үйретуге ерекше назар аудару қажет. Ол үшін әлемдік тәжірибеге сай тілдік лагерьлер жұмыс істейтін болады, яғни қалалық балалар жазда ауылдардағы қазақ отбасыларына барып, тілдік ортаға енеді. Түрлі этнос өкілдеріне ана тілдерін үйрену үшін бізде барлық жағдай жасалған, – деді облыс әкімі.

Сондай-ақ білім саласын цифрландыру мәселесі талқыланды. Өңірдің күллі мектептерінде IT, роботты техника сыныптары бар, білім беру мекемелерінің бәрі бейнебақылау жүйесімен, дабыл түймелерімен жабдықталған.

Енді «Digital East» қосымшасы арқылы ата-аналық бақылау бағдарламасы енгізілуде. Сонымен қатар оқушыларды цифрлық оқыту әлемдік стандартқа сай болуы үшін арнайы бағдарлама әзірлейтін топ құрылмақ.

Ержан Кеңесұлы