UMAI ұлттық сыйлығы тағайындалды
Ұлттық өнерді ұлықтап, талантымен өзгені тәнті етіп жүрген өнерпаздар баршылық. Оларды әрдайым бағалап, қолпаштап отырсаң ғана жұлдызы жанбақ. Осы мақсатта отандық мәдениет пен өнер қайраткерлерінің шығармашылық жетістіктерін дамыту, насихаттау үшін алғаш рет «UMAI» ұлттық сыйлығын беру ұйымдастырылуда.
Қазақ өнерді өгейсіткен халық емес. Қай уақытта да өнерлінің бағасын беріп, бағын байламауға тырысқан. Ол – баяғы дала дәстүрінен бері жалғасып келе жатқан үрдіс. Осыған дейін де өнерлінің өлшемі ретінде талай-талай сыйлықтар тағайындалып келді. Ал «Жаңа Қазақстанның» тағайындап жатқан жаңа сыйлығының жөні бір басқа. Қаржылай қолдау көрсетуді көздеп «Umai» ұлттық сыйлығының жүлде қоры үшін 54 млн. теңге бөлген. Өнердің әр саласын қамтыған сыйлықтың тағайындау барысында биылғы Балалар жылын да ескерусіз қалдырмапты.
– Бұл сыйлық Қазақстанның шығармашылық ұжымдары мен жекелеген өнер қайраткерлеріне елеулі шығармашылық табыстары мен кәсіби жетістіктері үшін төрт номинация бойынша 19 премия табыс етіледі. «Театр өнері», «Музыкалық орындаушылық өнер», «Хореографиялық өнер», «Театрдағы бейнелеу өнері». Сондай-ақ 2022 жылғы сыйлық аясында «Үздік балалар спектаклі үшін» арнайы жүлдесі тағайындалды. Сыйлық Балалар жылына орайластырылған, – деді мәдениет және спорт вице-министрі Нұрғиса Дәуешов.
Жеңімпаздарға берілетін сыйлықтың көлемі 2 миллион теңгеден басталып, 10 миллион теңгеге дейін болмақ. Ал сыйлыққа лайық деген үміткерлерді елге белгілі мәдениет және өнер қайраткерлерінен құралған 12 қазы сараптайтын болады.
Бұл талантымен топ жарып жүрген өнерпаздар бағын сынап, өнерінің бағасын алуға берілген зор мүмкіндік. Қазылар құрамы 12 желтоқсанға дейін финалистерді анықтайтын болады. Ал финалға іліккен үміткерлер Астана қаласында өтетін марапаттау рәсіміне шақырылатыны жоспарланған. Сондай-ақ жас қаламгерлердің еңбегі бағасыз қалмайтыны айтылды. Жас ақын-жазушыларға арналған жыл сайынғы «Айбоз» арнайы әдеби сыйлығы тағайындалған. Еңбектің жемісі, өнердің жеңісі болуы заңдылық. Сондықтан да сыйлыққа лайықпын деген өнерпаз болса қапы қалмағаны жөн.
Алтай Ғали-Асқар
