Тұрғындардың өтініштері де ескеріледі

Облыс орталығындағы тротуарларды жөндеу жұмыстары келесі жылы да жалғасады. Бұл жөнінде өзінің әлеуметтік желідегі парақшасында Өскемен қаласының әкімі Жақсылық Омар жазды.
– Қаламыздағы тротуарларды абаттандыру жұмыстары алдағы жылы да жалғасын табады. Әрине, бұл жұмыстарды жоспарлау кезінде біз жол полициясының ұсыныстарымен қатар, қала тұрғындарының өтініштерін де ескеретін боламыз, – деп мәлім етті қала әкімі.
Шаһар басшысы әлеуметтік желі қолданушыларынан бұл мәселе жөнінде ұсыныстар күтетінін де жеткізді. Оның айтуынша, өскемендіктердің талап-тілектері 2022 жылғы жұмыс тізімін жоспарлау кезінде міндетті түрде ескерілетін болады.
Айта кетейік, биыл шаһардың бірқатар көшесіндегі жолдар мен тротуарлар жөнделіп, 27 ауланы абаттандыру жұмыстары аяқталған.
Сәрсен Қабылым