Тұрақтылық пен татулық – ел дамуының кепілі
«Достық үйі – Қоғамдық келісім орталығында» Ақпарат және қоғамдық даму министрлігі Этносаралық қатынастарды дамыту комитетінің төрағасы Ғалым Нұрмағамбетұлы Шойкин өңіріміздегі этномәдени бірлестіктер және Қазақстан халқы Ассамблеясының мүшелерімен кездесіп, этносаралық қатынастар саласындағы мемлекеттік саясаттың басты бағыттарын талқылады. Биыл 15 қыркүйекте бекітілген 2022-2026 жылдарға арналған Қазақстан халқы Ассамблеясының даму тұжырымдамасын түсіндірді.
Ғалым Нұрмағамбетұлы алдымен Этносаралық қатынастарды дамыту комитетінің осыдан үш жыл бұрын ашылғанын, осы уақыт ішінде осы саладағы жұмыстың маңызды стратегиялық бағыттары айқындалып, біраз жұмыстың атқарылғанын айтты. Бүгінгі таңда әр облыстағы ішкі саясат басқармаларының жанынан арнайы этносаралық қатынастарды дамыту бөлімі ашылған. Бұл да болсын үлкен жетістік. Сондай-ақ министрлік жанында республикалық қоғамдық келісім кеңесі бар.
– Бұрын этносаралық қатынастарды дамыту ісімен тек Ассамблея айналысып келсе, қазір осы саладағы мемлекеттік саясатты жүзеге асырумен біздің комитет айналысады. Біздің көптеген жаңа жобаларымыз елдегі этносаралық қатынастарды әрі қарай дамытуға, қоғамдағы ауызбіршілікті сақтауға бағытталған. Жалпы, еліміздің бүгінгі жетістігі, тыныштығы мен тұрақтылығы – сіз бен біздің ортақ жұмысымыздың нәтижесі. Бейбітшілік пен келісім – Қазақстанның тұрақтылығының негізі. Кез келген экономикалық, саяси даму халықтың береке-бірлігінсіз іске аспайды. Сондықтан да бұл іске барлығымыз жұмылғанда ғана халықтың әл-ауқаты артады, – деді Ғалым Шойкин.
Этносаралық қатынастарды дамыту комитетінің төрағасы жиналғандардың назарын ақпараттық қауіпсіздік мәселесіне де аударды.
– Иә, бүгінгі заман – ақпарат заманы. Ұялы телефонды ашқанымыздан-ақ шындыққа жанаспайтын ақпарат тасқынының астында қаламыз. Қазіргі күні адамдарды адастыратын, этностар арасындағы қарым-қатынасқа сызат түсіретін, көңілге күдік ұялататын ақпарат өте көп. Бұған қарсы біз бірлесіп тұрғындардың иммунитетін күшейтуіміз керек. Бұл өте маңызды.
Бала дегеніңіз әркез бірі-бірімен төбелескен, төбелесе де береді. Олар діні, тілі, түрі басқа болғаннан төбелеспейді, әркім өзінің «менін» дәлелдегісі, қазіргі заманға сай бейімделгісі келеді. Өкінішке қарай, кейбіреулер осындай жағдайларды этносаралық шиеленіске дейін апарып, ушықтырғысы келеді, – деді Ғ.Шойкин.
Оның айтуынша, біздің елде этносаралық мәселе жоқ. Тек тұрмыстық, қылмыстық деңгейдегі мәселелер ғана халықтың көңілін алаңдатып жатады. Бұл жағдайды қалай реттеуге болады? Әрине, алдымен, жас ұрпақ тәрбиесіне көңіл бөліп, олармен жұмысты күшейту қажет.
Жалпы, Шығыс Қазақстан өңірінде 71 этномәдени бірлестік жұмыс істейді, барлық қалалар мен аудандарда Қоғамдық келісім кеңестері, Аналар кеңестері құрылған. Медиация орталықтары, журналистер, меценаттар, еріктілер клубтары бар. «Возрождение» тілдер мектебінде еркін түрде сегіз ұлттың тілін оқытатын тіл курсы ұйымдастырылған.
Қазақстан халқы Ассамблеясының этносаралық қатынастарды дамытудағы орны айрықша. Ассамблея мүшелері Конституцияда барлық қазақстандықтың құқық және бостандық теңдігіне құрметпен қарай отырып барлық этностың мүддесін қолдайды. Ұлттық мәдениет пен салт-дәстүрлерді сақтау және дамыту істері бойынша біздің облыс үшін ағымдағы жылдың маңызы ерекше. Өйткені 30 жыл бұрын Шығыс Қазақстан облысында Қазақстандағы тұңғыш Достық үйі ашылды. Бүгінгі таңда облыстық, алты қалалық, аудандық Достық үйлерінің шаңырақтары астына көпұлтты мәдениет палитрасы біріккен.
Кездесу соңында Ғ.Шойкин жиналғандардың сауалдарына жауап берді.
Мейрам Екпін
