Тұрақтандыру бағытында жұмыс істейді
Азамат Темірбеков
Риддер қаласында әлеуметтік бағада нан сататын 46 дүкен бар.
Риддер қаласында әлеуметтік маңыздағы азық-түлік бағаларын тұрақтандыруға бағытталған жұмыстар тұрақты түрде жүргізілуде. Атап айтсақ, бүгінгі күні қалада шаһар басшысының өкімімен бес мобильді топ құрылып, оған қалалық мәслихат депутаттары, еріктілер, «Аманат» партиясының өкілдері мен басқа да тұлғалар енгізілді. Аптасына бес күн рейдтік іс-шаралар өткізетін аталмыш топ жыл басынан бері 667 рет рейд ұйымдастырып, алты мыңға жуық сауда нысанындағы әлеуметтік маңызы бар азық-түлік тауарларындағы сауда үстемесін қатаң қадағалады.
Бұдан бөлек, қалада бағаны тұрақтандыру мақсатында әлеуметтік маңызы бар азық-түлік тауарларында ең төменгі сауда үстемесін сақтау бойынша кәсіпкерлермен 73 меморандум жасалған. Оған қоса жергілікті тауар өндіруші болып келетін «MILKOM» кәсіпорнымен меморандум жасалып, оның өндірген тауарларын орналастыруға жеңілдетілген тәртіпте орындар беруге келісім жасалды.
– Жалпы, қала бойынша қазіргі уақытта 100-105 теңгеден әлеуметтік нан сататын 46 дүкен бар, – дейді Риддер қаласы әкімінің орынбасары Әсем Ағажаева. – Сондай-ақ «жақсылық сөрелері» мен «әлеуметтік сөрелер» жұмыс істейді. «Ертіс» әлеуметтік-кәсіпкерлік корпорациясы» акционерлік қоғамы, Риддер қаласы әкімдігі мен кәсіпкерлік субъектілері арасында күнбағыс майы, қарақұмық жармасы, күріш, макарон өнімдері, жұмыртқа, қырыққабат, қант сияқты азық-түлік тауарларына 10-15 пайыздық сауда үстемесін қолдана отырып, төмендетілген бағамен сату бойынша үшжақты меморандум жасалды.
Оның айтуынша, қазіргі уақытта қаланың «Прометей», «Мясокрай», «Гурман», «Восток», «ТК Риддер-Қазақстан», «Белоснежка», «Нежность», «Фактория» дүкендерінде қарақұмық жармасы, күнбағыс майы мен қант әлеуметтік бағада сатылып жатқан көрінеді. Жалпы, қалаға «Ертіс» әлеуметтік-кәсіпкерлік корпорациясы тоқсан мың тоннадан астам өнім әкелді. Сонымен қатар бірінші сұрыпты нан бағасын тұрақтандыру мақсатында облыстық ауыл шаруашылығы басқармасы арқылы жергілікті наубайханалармен алты меморандум жасалды.
Қалада азық-түлік бағасының тұрақты болуына жергілікті әкімдік тарапынан ұйымдастырылған ауыл шаруашылығы жәрмеңкелері де өз септігін тигізуде. Жалпы, жыл басынан бері осындай 11 жәрмеңке өткізіліп, онда үш тоннаға жуық ет өнімдері сатылған. Оған қоса қыркүйек айынан бастап жергілікті жердегі шаруашылықтардың демалыс күндері жеміс-жидектері мен көкөніс өнімдерін сату жәрмеңкелері басталып, оларда картоп, қырыққабат және сәбіз сияқты көкөністер сатыла бастады. Сондай-ақ аталмыш жәрмеңкелерден Шемонайха, Ұлан аудандары мен Өскемен қаласының шаруа қожалықтары да қалыс қалмай сиыр, қой, жылқы және шошқа еті сияқты өз өнімдерін саудалап отырады.
